Əqli Mülkiyyət Agentliyi “Batareyaları təhvil ver, təbiəti qoru” layihəsinə qoşulub
Bakı, 23 avqust, AZƏRTAC
Bu ilin aprelində Ekologiya və Təbii Sərvətlər Nazirliyi və Qırmızı Ürəklər Fondu “Batareyaları təhvil ver, təbiəti qoru” layihəsinə start verib. Əqli Mülkiyyət Agentliyi də bu ekoloji təşəbbüsə qoşulub. Müvafiq tullantı qutuları Agentliyin və tabeliyində olan qurumların inzibati binalarında yerləşdirilib.
Bu barədə AZƏRTAC-a Agentlikdən məlumat verilib. Bildirilib ki, Agentlik iqlim dəyişikliyi, ekologiya və ətraf mühitin qorunması sahəsində həyata keçirilən layihələri yüksək dəyərləndirir və hər zaman belə təşəbbüslərə dəstək verməyə hazırdır.
“Batareyaları təhvil ver, təbiəti qoru” layihəsi ətraf mühitin mühafizəsi, insanların sağlamlığının qorunması, ekoloji tarazlığın bərpası, təkrar emalın təşviqi, tullantıların azaldılması, işlənmiş batareya tullantılarının zərərli təsirlərinin qarşısının alınması və səmərəli idarə olunması məqsədi daşıyır. İşlənmiş batareyaların digər tullantılardan ayrılaraq toplanması onların ətraf mühitə və insan sağlamlığına mənfi təsirlərini azaltmağa xidmət edəcək.
Bölmənin digər xəbərləri
