ADA Universiteti, Cavid Qədirov, açıqlama

Ermənistan Azərbaycana qarşı işğalçılıq siyasəti apararaq beynəlxalq hüquq normalarını pozur

Bakı, 19 oktyabr, AZƏRTAC

Ermənistan Azərbaycana qarşı işğalçılıq siyasəti apararaq BMT Nizamnaməsinin 2.4-cü maddəsində göstərilən silahlı qüvvədən istifadə qadağasını və müvafiq beynəlxalq adət hüququnun normalarını pozur. Müasir beynəlxalq hüququn təməl qaydalarından biri olan BMT Nizamnaməsinin 2.4-cü maddəsinə əsasən bütün üzvlər beynəlxalq münasibətlərində hər hansı dövlətin ərazi bütövlüyünə və siyasi müstəqilliyinə qarşı BMT-nin məqsədləri ilə bir araya sığmayan hər hansı şəkildə güclə hədələməkdən və güc tətbiqindən çəkinirlər. Bundan əlavə, Beynəlxalq Ədalət Məhkəməsinin Nikaraqua qərarında tutduğu mövqeyə uyğun olaraq, müdaxilə etməmək qaydası, silahlı qüvvədən istifadənin qadağan edilməsi və başqalarının ərazi suverenliyinə hörmət etmə öhdəlikləri beynəlxalq adət hüququn normalarıdır.

Bu fikirləri AZƏRTAC-a açıqlamasında ADA Universitetində hüquq fənnini tədris edən Cavid Qədirov deyib. O bildirib ki, Ermənistan qeyd olunan qaydanı iki yolla pozur:

- Öz silahlı qüvvələrini Azərbaycanda yerləşdirməklə və Ermənistan ərazisindəki bazalardan Azərbaycana zərbələr endirməklə;

-Qondarma “Dağlıq Qarabağ Respublikası”nın (“DQR”) hərəkətləri Ermənistan respublikasına aid edildiyindən, həmin silahlı qüvvələrin güc tətbiq etməsi də Ermənistana aiddir.

Beynəlxalq hüquqa görə, dövlət qeyri-dövlət qurumunun üzərində “rəhbərlik və nəzarət” həyata keçirdiyi təqdirdə qeyri-dövlət qurumlarının hərəkətləri dövlətə şamil edilir. Bu baxımdan, İnsan hüquqları üzrə Avropa Məhkəməsi “Çıraqov və digərlərinin Ermənistana qarşı” işi üzrə qərarında Ermənistan respublikasının “DQR” üzərində təsirli nəzarəti həyata keçirdiyini təsdiqlədi. Əlavə olaraq, Ermənistan Azərbaycandakı erməni silahlılarına fəal və davamlı dəstək verməklə beynəlxalq hüququn müdaxilə etməmək prinsipini pozur.

Cavid Qədirov qeyd edib ki, Azərbaycan Respublikasının BMT Nizamnaməsinin 51-ci maddəsinə görə, özünümüdafiə hüququ əsasında Ermənistana qarşı silahlı qüvvə istifadə etmək hüququ var. Həmin maddədə göstərilir ki, üzv dövlətlər onlara qarşı silahlı hücum baş verərsə, fərdi və ya kollektiv özünümüdafiə hüququna malikdirlər. Ermənistan ordusunun öz ərazisindən ölkəmizə hücumları, Ermənistan ordusunun Azərbaycan Respublikası ərazisindən hücumları, “DQR qüvvələri”nin Ermənistana aid edilən hücumları BMT Nizamnaməsinin 51-ci maddəsinə əsasən, “silahlı hücum”dur və Azərbaycan Respublikasının özünümüdafiə üçün zəruri və mütənasib silahlı qüvvədən istifadə hüququnu əsaslandırır.

ADA Universitetinin müəllimi Cavid Qədirov vurğulayıb ki, üçüncü dövlətlərin Azərbaycanın bir hissəsinin Ermənistan tərəfindən işğalını tanımaq və bu vəziyyəti qorumaq üçün Ermənistana heç bir dəstək və yardım göstərməmək öhdəliyi var. BMT Təhlükəsizlik Şurasının 822, 853, 874 və 884 saylı qətnamələrinin şərtlərini pozaraq, Ermənistan işğalçı qüvvələrin birtərəfli şəkildə geri çəkilməsini yerinə yetirmək əvəzinə, Azərbaycanda ərazi işğalını davam etdirir.