Ermənistan “Dəmir yumruğ”un dadını yenə də hiss etdi – Şərh
Bakı, 13 aprel, AZƏRTAC
Prezident, Ali Baş Komandan İlham Əliyevin düzgün müəyyənləşdirdiyi siyasi strategiya sayəsində müzəffər Ordumuzun işğalçı Ermənistanı diz çökdürməsindən və kapitulyasiya aktını imzalatdırmasından iki ildən artıq vaxt keçməsinə baxmayaraq, ermənipərəst qüvvələr bu acınacaqlı məğlubiyyəti hələ də həzm edə bilmir, iki ölkə arasında münasibətlərin yaxşılaşdırılmasına və sülh müqaviləsinin imzalanmasına müxtəlif vasitələrlə mane olurlar. Elə Ermənistanda da bu məğlubiyyətlə barışmaq istəməyən qüvvələr var və onlar vaxtaşırı təxribatlar törətməyə cəhd edirlər. Ancaq fakt faktlığında qalır. Ermənistanın baş naziri Nikol Paşinyanın da imzaladığı 2020-ci il 10 noyabr tarixli üçtərəfli Bəyanat Ermənistanın məğlubiyyətini, Azərbaycanın Qələbəsini rəsmiləşdirdi. Bütün bunlara baxmayaraq, erməni hərbi birləşmələri işğalçılıq niyyətindən əl çəkmir, Qarabağda təxribat törətməkdə davam edirlər. Bir neçə gün əvvəl Laçın rayonunda da çirkin niyyətlərini həyata keçirmək istədilər. Lakin bu dəfə də “Dəmir yumruğ”un dadını yenidən hiss etdilər.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, əslində, Ermənistan “Dəmir yumruğ”un dadını unutmamalıdır. Bu dad ömürlük onların damaqlarında qalmalıdır: “Bu təxribatı törədənlərin əsas məqsədi Ermənistanla Azərbaycan arasında sülh müqaviləsinin imzalanmasına mane olmaqdır. Digər məqsəd delimitasiya və demarkasiyanın baş tutmasına problem yaratmaqdır. Əsas məsələlərdən biri də ekofəalların Laçın-Xankəndi yolunda 4 aydır davam edən dinc aksiyası və haqlı tələbləridir. Artıq dörd aydır ki, həmin istiqamətdən qaçaqmalçılığın, silah-sursat, canlı hərbi qüvvə və narkotik vasitələrin daşınmasının qarşısı alınıb. Ermənilərə havadarlıq edənlər Azərbaycanın yerüstü və yeraltı təbii sərvətlərini də dədələrinin malı kimi daşıya bilmirlər. Artıq bu istiqamətdə bütün yollara bizim tərəfimizdən nəzarət olunur”.
Siyasi şərhçi deyib ki, həmin ərazidə qalmış müəyyən bir sahədə delimitasiya və demarkasiya üçün danışıqlar başlaya bilərdi. Əslində, Ermənistanın bir sıra dövlət rəsmiləri də bu barədə düşünür və danışıqlar aparmağa hazırlaşırdılar. Ancaq bəzi erməni hərbçiləri həmin ərazidəki bəzi yüksəklikləri öz xoşuna təhvil vermək istəmirdilər. Artıq ermənilərin nazı ilə oynamağa son qoyulub. Hazırda həmin yüksəkliklərə bizim yenilməz ordumuz nəzarət edir və orada möhkəmlənmə və yenidənqurma işləri aparılır. Təbii ki, bütün bunlar Azərbaycanın növbəti qələbəsi, Ermənistanın isə məğlubiyyət seriyalıdır. Eyni zamanda, bu möhkəmlənmə işləri Ermənistan və havadarlarına növbəti zərbədir.
Son vaxtlar Ermənistan və Azərbaycanın dövlət başçılarının növbəti görüşü və sülh müqaviləsi barədə danışıqların anonsundan söhbət açan Ə.Bədəlov deyib ki, ümumiyyətlə, hər dəfə iki ölkənin dövlət başçıları arasında görüşlər keçirilməsi ərəfəsində belə bir problem baş verir. Fransa və İran kimi ermənipərəst qüvvələr sülh müqaviləsinin imzalanmasına mane olmaq üçün min bir oyundan çıxırlar. Belə təxribatlar qəsdən təşkil olunur ki, hər hansı bir sülh müqaviləsindən söhbət getməsin. Necə ola bilər ki, Avropa İttifaqının mülki müşahidə missiyasının gözü qarşısında belə təxribatlar baş verir və missiya üzvləri bunu görmürlər? Mülki missiya gəlməmişdən əvvəl də aydın hiss olunurdu ki, bu missiyanın Ermənistanla Azərbaycan arasında sülh müqaviləsinin imzalanmasına heç bir köməyi olmayacaq. Əksinə, gərginliyi artıracaqlar. Elə də oldu: “Təəssüf doğuran məqam o oldu ki, şəhidlərimiz oldu. Ancaq “Dəmir yumruq” şəhidlərimizin qisasını həmin an aldı. Bu təxribatı törədən erməni hərbi birləşmələri ciddi itkilər verdilər. Bunu işğalçı ölkənin media vasitələri də təsdiqləyirlər. Hətta bu itkiləri eşidən Ermənistan parlamenti öz sessiyasını yarımçıq saxladı. Yəqin ki, bundan sonra daha “Dəmir yumruğ”un dadını unutmazlar”, - deyə Ə.Bədəlov bildirib.
Bölmənin digər xəbərləri
