Ermənistan mülki obyektləri hədəfə almaqla acizliyini göstərdi
Bakı, 8 oktyabr, AZƏRTAC
Otuz ilə yaxın düşmən işğalı altında olan torpaqlarımız şanlı ordumuzun müzəffər yürüşü sayəsində azad edilir. Ali Baş Komandanın rəhbərliyi ilə Azərbaycan Ordusunun zəfər yürüşü davam edir. Bu zəfər yürüşü hər açılan sabaha inamımızı əks etdirməklə bizi yeni qələbələrə runlandırır.
İşğaldan azad olunan Suqovuşanda təkcə su qovuşmur, torpaq da torpağa qovuşur. Bu xoşbəxtliyi, bu tarixi bizə yaşadan Ordumuza, dövlətimizə və Ali Baş Komandana minnətdarıq.
Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva söyləyib.
Məkrli düşmənin təmas xəttindən xeyli kənarda yerləşən yaşayış obyektlərini, mülki əhalini hədəfə almasından hiddətləndiyini deyən Mədəniyyət komitəsinin sədri bildirib: “Azərbaycan Ordusunun əks-hücumu nəticəsində başını itirən Ermənistan mülki obyektləri hədəfə almaqla acizliyini göstərdi. Bununla Ermənistan öz qanında boğulmaq yolunu özünə təmin etmiş oldu. Ali Baş Komandanına, dövlətinə, Ordusuna inanan, həmrəylik və ruh yüksəkliyi nümayiş etdirən Azərbaycan xalqı böyük çoşqu ilə qələbəyə töhfə vermək üçün can yandırır”.
Q.Paşayeva qeyd edib ki, Suqovuşan və işğaldan azad edilən digər ərazilərimizin, xüsusilə Arazboyu, tarixi Xudafərin körpüsünün yerləşdiyi strateji əhəmiyyətli Cəbrayıl rayonunun bizə qovuşması “hüququndan keçən əsgər”lərimizin tarix yazdığını bir daha sübut edir. “Ordumuzun əks-hücumu nəticəsində düşmənin öz döyüş bayrağını, çoxsaylı silah-sursatı, hərbi texnikasını döyüş meydanında qoyub qaçması onu göstərir ki, qarşı tərəf öz hərbçi namusunu hifz etmək iqtidarında deyil. Azad olunan ərazilər böyük əhəmiyyətə malikdir və digər - daha böyük ərazilərimizin azad olunması üçün müstəsna önəm daşıyır. Digər tərəfdən, cəbhəyə yaxın ərazidə mülki əhalimizin düşmən atəşindən daha etibarlı müdafiəsi imkanları genişlənir”, - deyə Q.Paşayeva bildirib.
Deputat vurğulayıb ki, Ermənistanın çöküşü uzaqda deyil. Bu aqibəti onlar haqsızlıqla, soyqırımı aktları törədə-törədə özləri yaratdı. Ermənistan sülhə gəlməyərək, hətta bizi yeni torpaqların işğalı ilə hədələdi və bizə hərbidən başqa yol qoymadı. Q.Paşayeva, həmçinin bildirib: “Onsuz da kövrək atəşkəs rejimini az qala hər gün pozan Ermənistan silahlı qüvvələri öz təcavüzkarlığını guya “demokrat” Paşinyanın səbatsız davranışları ilə tamamlayaraq, bu il daha çox təxribatlar törətməyə başladılar. İyulda Tovuzda sərhəd toqquşması, avqustda Goranboyda diversiya-kəşfiyyat həmləsi, nəhayət, sentyabrda işğal altındakı Qarabağ torpaqlarından genişmiqyaslı hücum və bizimlə şərtlərlə danışması Ermənistanın sonunu gətirdi. Bununla da təbii ki, Azərbaycanın əks-həmləsi və Ali Baş Komandanın əmri ilə bütün cəbhə boyu hücuma keçməyimiz qaçılmaz oldu”.
Qənirə Paşayeva hazırkı vəziyyətdə Ermənistan üçün artıq danışıqlardan, sülhdən danışmaq əyləncə mövzusu olmayacağını bildirib. Onun sözlərin görə, düşmən Azərbaycan Ordusunun gücünü gördü. Ermənistan siyasi rəhbərliyi vaxtilə Levon Ter-Petrosyanın vaxtilə dediyi “sonralar yalvaracağımız şərtlərə indi razı olmalıyıq” sözlərini gərək qulaqardına vurmayaydılar. “Artıq heç nə əvvəlki kimi olmayacaq. Uzun müddət səbir göstərməyimizdən, beynəlxalq hüquqa çağırışlarımızdan nəticə çıxara bilməyən, özlərini “keçilməz sədd”lərə, “qalib tərəf üstünlüyü”nə inandıran Ermənistan tərəfi, indi buyursun, düşünmək üçün nə qədər qiymətli vaxt və digər şanslar itirdiyini yaxşı-yaxşı hesablasın”, - deyə o qeyd edib.
Deputat vurğulayıb ki, Ermənistan həmişə öz havadarlarına, erməni diasporuna və lobbiçilərinə bel bağlayıb, biz isə ədalətin qələbəsinə inanmışıq. Rəhbərimizə, onun müdrikliyinə bel bağlamışıq.
Q.Paşayeva deyib: “Biz dövlət, xalq və ölkə olaraq hər zaman məhz haqq-ədalətin zəfərinə, beynəlxalq hüququn təntənəsinə inandıq. Öz gücümüzə arxalanaraq, bugünkü zəfər üçün hazırlaşdıq! Düşmən bizi əzdiyini düşündüyü halda, biz daha da möhkəmləndik, daha da gücləndik! Bu gün əldə etdiyimiz uğurlar həm də beynəlxalq səviyyədə aparılan işin bəhrəsidir.
Bizim işimiz haqq işidir, biz mütləq qalib gələcəyik! Dövlətimiz var olsun!
Bölmənin digər xəbərləri
