Ermənistan özünün iqtisadi maraqlarını güdərək Espo Konvensiyasının müddəalarını ciddi şəkildə pozur
Bakı, 12 iyun, AZƏRTAC
Bildiyimiz kimi, Ermənistan Azərbaycanın Naxçıvanla həmsərhəd bölgəsində- Arazdəyəndə iri metallurgiya zavodunu inşa etməyi planlaşdırır. 70 milyon ABŞ dolları dəyərində sərmayə qoyulması zavodun kifayət qədər böyük olacağını göstərir. Həmin metallurgiya zavodunun zəhərli kimyəvi tullantıları bölgədəki ekoloji sistemə ciddi zərbə vura bilər. Onun tullantılarının Araz çayına axıdılması isə çayın canlı aləminə ciddi təhdiddir. Bölgədə çayın suyundan müxtəlif məqsədlərlə, xüsusilə də suvarma üçün istifadə edildiyini nəzərə alsaq, bu, geniş təsərrüfatlar üçün növbəti “həyəcan siqnalı” deməkdir.
Bunu AZƏRTAC-a müsahibəsində “Ekoloji Maarifçilik və Monitorinq” İctimai Birliyinin sədri Qəmzə Yusubova Ermənistanın Naxçıvan Muxtar Respublikası ilə həmsərhəd bölgəsində - Arazdəyəndə iri metallurgiya zavodunu inşa etmək niyyətinə münasibət bildirərək deyib.
Ermənistanın dağ-mədən sənayesində ümumiyyətlə heç bir beynəlxalq standartları gözləmədiyini qeyd edən Q.Yusubova bunun nəinki Azərbaycan, eləcə də bölgə üçün ciddi ekoloji təhdid yaratdığını diqqətə çatdırıb. Bildirilib ki, Azərbaycan tərəfi ilə razılaşdırılmadan belə bir zavodun tikilməsi 1991-ci il Espo Konvensiyasının kobud şəkildə pozulmasıdır: “Azərbaycan və Ermənistan həmin Konvensiyanın tərəfləridir. Ermənistan sırf özünün iqtisadi maraqlarını güdərək Konvensiyanın müddəalarını ciddi şəkildə pozur. Ümumiyyətlə, həmin zavodun tikilişi zamanı Konvensiyaya uyğun olaraq ətraf mühitə təsir qiymətləndirilməli və həmin sənədlər Azərbaycanla razılaşdırılmalıdır. Ermənistan tərəfi növbəti dəfə bunları görməzdən gəlir və iqtisadi maraqlarını rəhbər tutaraq istədiyi kimi hərəkət edir. Ermənistanın tələblərə riayət etməməsi onu göstərir ki, həmin ölkə bölgədə destruktiv siyasət aparır, ənənəvi əməllərinə uyğun yenə də öhdəliklərini yerinə yetirməkdən boyun qaçırır”.
Qeyd olunub ki, Ermənistan tərəfindən Azərbaycana qarşı ekoloji terror siyasətinin aparılması yenilik deyil. Belə ki, “Metsamor” Atom Elektrik Stansiyasının bölgədə fəaliyyəti ətraf mühitə qarşı təhdid kimi qalmaqda davam edir. Bu məqamda işğal dövründə rayonlarımıza, şəhərlərimizə qarşı törədilən ekoloji terroru xüsusi qeyd etmək yerinə düşər. Təəssüf ki, Oxçuçaya qarşı ekosid hələ də davam edir. Belə ki, kimyəvi tərkibli istehsalat sularının Oxçuçaya axıdılması çayın ekosistemini bərpaolunmaz deqradasiyaya məruz qoyub, bölgə üçün ciddi ekoloji problem yaradıb. Ümumiyyətlə törətdiyi ekoloji cinayətlərlə Ermənistan BMT-nin Dayanıqlı İnkişaf Məqsədlərini ciddi şəkildə pozur. 2022-ci ildə BMT təmiz, sağlam və dayanıqlı ətraf mühiti insan hüququ kimi tanıyıb. Növbəti dəfə məsuliyyətsiz davranış sərgiləyən Ermənistan bölgədəki insanların sağlam və dayanıqlı ətraf mühit hüququnu əlindən alır.
Bölmənin digər xəbərləri
