Ermənistan rəhbərliyi sərhəddə təxribat törətməklə siyasi məqsədlərinə nail olmaq istəyir - Şərh
Bakı, 13 aprel, AZƏRTAC
Ermənistan rəhbərliyi Azərbaycanla şərti sərhəddə vəziyyətin gərginləşməsi yönündə təxribat törətməklə siyasi hədəflərinə nail olmaq istəyir. Son zamanlar bu təxribatın baş verməsi üçün müəyyən şərait yaradılmışdı. ABŞ-da Ermənistanla sülh müqaviləsinin imzalanması ilə bağlı Azərbaycan tərəfindən çox ciddi addımlar atılırdı, bu istiqamətdə danışıqlar aparılırdı. Bu təxribat danışıqlar prosesində müəyyən pozitiv meyillərin olduğu, hətta gündəlikdə tərəflərin danışıqları davam etdirmək üçün Vaşinqtona dəvət ediləcəyi məsələsi gündəmdə olduğu dövrdə baş verdi. Laçın-Xankəndi istiqamətindəki yollarda Azərbaycan Ordusunun bölmələri tərəfindən lokal zəruri nəzarət tədbirləri həyata keçirildi və nəticədə həmin ərazidə olan bir sıra yüksəkliklər Ordumuzun nəzarəti altına keçdi. Bütün bu tədbirlər Ermənistandan Qarabağa silah-sursatın, şəxsi heyətin daşınmasının qarşısının alınması ilə nəticələndi. Prezident, Ali Baş Komandan İlham Əliyevin Laçın rayonu ilə Ermənistan arasındakı sərhəddə nəzarət-buraxılış məntəqələrinin yaradılması ilə bağlı fikirləri də buna əsas verirdi.
Bu sözləri AZƏRTAC-a açıqlamasında ehtiyatda olan polkovnik Şair Ramaldanov deyib.
Polkovnik bildirib ki, həmin mənzərə fonunda həmişə olduğu kimi Ermənistan məqsədyönlü şəkildə şərti sərhəddə təxribat törətdi. Bu təxribat sülh müqaviləsini imzalamaqdan və üçtərəfli Bəyanatdan irəli gələn digər bəndləri yerinə yetirməkdən yayınmaq məqsədi daşıyırdı. Ona görə ki, təxribat baş verəndə bütün məsələləri əvvəlki vəziyyətə gətirmək üçün müəyyən vaxt tələb olunur. Belə çıxır ki, Ermənistan əsas öhdəliklərinin icrasından yayınmağı qarşısına məqsəd qoyub. Bu, Ermənistan tərəfindən məqsədyönlü şəkildə törədilmiş növbəti təxribatdır və Ermənistanın hərbi rəhbərliyinin bilavasitə nəzarətində olub. Beləliklə, hadisəyə görə bütün məsuliyyət Ermənistanın hərbi-siyasi rəhbərliyinin üzərinə düşür.
Şair Ramaldanov vurğulayıb ki, Ermənistan bu təxribatla hərbi baxımdan heç bir nəticə əldə etməyəcək. Ancaq müəyyən siyasi hədəflərə, yəni sülh müqaviləsinin imzalanması vaxtını uzatmağa nail ola bilər. Digər tərəfdən məqsəd vəziyyəti gərginləşdirməklə, yeni ölkələrin və Kollektiv Təhlükəsizlik Müqaviləsi Təşkilatının (KTMT) diqqətini bu regiona cəlb etmək, Rusiyanın burada fəaliyyətsizliyi haqqında müəyyən bəyanatlar verməkdir. Eyni zamanda, Ermənistan Avropa İttifaqının missiyasının qonşu ölkədə yerləşməsinin əhəmiyyətini artırmaq kimi hədəflərə nail olmaq istəyir. Ermənistan Aİ missiyasının ölkədə olduğuna güvənərək ümid edirdi ki, bu həmlə ilə Azərbaycanı günahkar qismində göstərmək mümkün olacaq. Ancaq istəyinə nail ola bilmədi və indi təxribatına izahat vermək məcburiyyətindədir.
Lakin Azərbaycan Ordusu bütün əməliyyat şəraitini nəzarət altında saxlayaraq adekvat addımlar atmağa davam etdi. Son təxribata qarşı Azərbaycan Ordusu cavab tədbirləri gördü. Beləliklə, Ermənistanın niyyətləri gerçəkləşmədi və əks tərəf növbəti dəfə layiqli cavabını aldı. Şəhidlərimizin qanı yerdə qalmadı, Ermənistan ordusu daha çox itki verdi. Düşmən nəticə etibarilə planlarının tam pozulduğunu gördü. Təcavüzkar ölkənin hakimiyyəti başa düşməlidir ki, müxtəlif qüvvələrin dəstəyini əldə edib məqsədlərini gerçəkləşdirəcəyinə ümid etməkdənsə, ardıcıl təxribatlar yolunu davam etdirməkdənsə, mövcud reallıqlarla razılaşıb sülh müqaviləsi üzərində işləri davam etdirsə, həm Ermənistan dövləti, həm də erməni xalqı üçün daha yaxşı olar.
Onun sözlərinə görə, həmişə olduğu kimi Ermənistan tərəfi döyüşdəki itkilərini gizlətməyə çalışır. Əvvəlcə itkilərin olmaması ilə bağlı ilkin məlumat verir. Müəyyən müddətdən sonra itkilərin çoxalması ilə bağlı məlumatlar yayır. Bu ölkədə cəmiyyətin itkilərə olan münasibətini nəzərə alsaq, Ermənistanda sadə insanlar müharibəni istəmirlər. Ermənistan cəmiyyətində narazılıq dalğasının artmaması üçün itkilər gizlədilir. Ona görə də, düşünürəm ki, Ermənistanla Azərbaycan arasında sülh müqaviləsi imzalanmayana qədər təcavüzkar ölkənin hərbi-siyasi rəhbərliyi və onun havadarları regionda vəziyyətin gərginləşməsində maraqlıdırlar.
“Odur ki, biz daim ayıq-sayıq olmalıyıq. Ancaq bundan sonra Azərbaycan Ordusunun erməni təxribatçılarına cavabı daha sərt şəkildə olacaq. Prezident İlham Əliyevin dediyi kimi, əgər Ermənistan və onun havadarlarından ölkəmizə qarşı hər hansı təhlükə yaranarsa, Azərbaycan cavab tədbirləri görəcək. Yaxın zamanlarda biz bu atılan addımların müəyyən nəticələrini görə bilərik.
İranın Ermənistana dronlar və digər hərbi sursatlar verməsi ilə bağlı məlumatlar da mövcuddur. Ancaq ehtimal oluna bilər ki, təxribat zamanı istifadə edilən silahlar arasında məhz dronlar da olub”, - deyə hərbi ekspert qeyd edib.
Bölmənin digər xəbərləri
