Ermənistan rəhbərliyinə xəbərdarlıq edildi, Qarabağda yaşayan ermənilərə isə çıxış yolu göstərildi
Bakı, 3 avqust, AZƏRTAC
Dövlətimizin başçısı İlham Əliyev “Euronews” televiziyasına müsahibəsində Ermənistan rəhbərliyinə xəbərdarlıq etdi, Qarabağda yaşayan ermənilərə isə çıxış yolu göstərdi.
Bunu AZƏRTAC-a açıqlamasında Milli Məclisin deputatı Anar Məmmədov deyib.
O bildirib ki, Azərbaycan lideri 44 günlük müharibədən sonra bütün çıxışlarında Ermənistanı sülh müqaviləsini imzalamağa çağıraraq məğlub ölkənin xeyrinə olan təkliflər səsləndirir, düşdüyü bataqlıqdan çıxış yolu göstərir. Bununla yanaşı, Prezident İlham Əliyev qalib ölkənin qətiyyətli lideri kimi üçtərəfli Bəyanatın müddəalarına əsasən üzərinə düşən öhdəlikləri vicdanla yerinə yetirir.
“Prezident İlham Əliyev müsahibəsində qeyd etdi ki, bu gün Ermənistanla Azərbaycan arasında gedən normallaşma prosesində Qarabağ mövzusu yoxdur. Bu gün danışıqlar masasında hər hansı bir statusdan, ümumiyyətlə, söhbət belə getmir. Müzakirə mövzusu yalnız Qarabağda yaşayan ermənilərin hüquqları və təhlükəsizliyi məsələsidir. Azərbaycan Qarabağ ermənilərinə normal həyat təklif edir. Dövlətimizin başçısının bu məsələdə mövqeyi ortadadır. Bəyan edildi ki, Qarabağda yaşayan ermənilərin hüquqları da, təhlükəsizliyi də Azərbaycan dövləti tərəfindən təmin ediləcək. Qarabağ erməniləri başa düşməlidirlər ki, təhlükəsizlik təminatları, hüquqlarının, o cümlədən təhsil, mədəniyyət, dini, bələdiyyə hüquqlarının təmin edilməsi ilə Azərbaycan cəmiyyətinin bir hissəsi olaraq onlar normal həyat yaşayacaqlar. Ermənilər də yaxşı bilirlər ki, Azərbaycan Prezidenti verdiyi vədin, sözün hər zaman arxasında duraraq onu reallığa çevirən liderdir”, - deyə A.Məmmədov vurğulayıb.
Deputat bildirib ki, Prezident İlham Əliyev bir daha Qarabağda yaşayan ermənilərə səslənərək onlara düzgün seçim yolu tövsiyə edib. Diqqətə çatdırıldı ki, onların gələcəyi ancaq Azərbaycan cəmiyyətinə inteqrasiyadan keçir. Başqa cür mümkün deyil.
Ermənistana qarşı hər hansı bir ərazi iddiamızın olmadığını diqqətə çatdıran dövlətimizin başçısı müsahibəsində “İndi sülh bizim gündəliyimizdədir”, - deyə vurğuladı. Bildirildi ki, Ermənistan sülh istəyərsə, biz ona nail olacağıq. Çünki bizim onlara qarşı ərazi iddiamız yoxdursa, qarşı tərəfin də olmamalıdır. Azərbaycan heç bir dövlətə, o cümlədən Ermənistana qarşı ərazi iddiasında olmadığını sözdə deyil, əməli şəkildə nümayiş etdirir, qarşı tərəfdən də eyni addımların atılmasını gözləyir. Ermənistanın baş naziri isə dəfələrlə ölkəsinin Qarabağ və anklavlar da daxil olmaqla, Azərbaycanın ərazi bütövlüyünü rəsmən tanıdığını bəyan etsə də, hər fürsətdə müxtəlif bəhanələrlə Azərbaycanın daxili işlərinə müdaxilə etməyə çalışır.
Deputatın sözlərinə görə, Azərbaycan Prezidenti bir daha Ermənistan rəhbərliyinə ötürdüyü mesajla bildirdi ki, müharibə artıq bitib və Qarabağ münaqişəsinə son qoyulub. İndi sülh danışıqlarına başlamağın vaxtıdır. Hələ ki qarşı tərəfdən müsbət cavab alınmasa da, Azərbaycan ümid edir ki, tezliklə bu, baş verəcək. Çünki indi diktəni qalib ölkə və onun lideri edir. Azərbaycanın gördüyü işlər isə Ermənistanın da xeyrinə işləyir.
“Prezident İlham Əliyevin əzmi, qətiyyəti, müdrik siyasəti nəticəsində hərb meydanında, beynəlxalq hüquq müstəvisində məğlub olan Ermənistan növbəti dəfə nüfuzlu media platformasında ifşa olundu. Təcavüzkar üzərində ard-arda çalınan bütün bu qələbələr isə Azərbaycanın öz milli maraqlarını beynəlxalq hüququn norma və prinsiplərinə uyğun ardıcıllıqla və qətiyyətlə təmin etməsinin parlaq təzahürləridir.
Müsahibənin məhz Qarabağın mirvarisi Şuşada təşkil olunması ilə artıq bu tarixi Azərbaycan şəhərinin dirçəldilməsinin, mədəni, mənəvi ruhunun özünə qaytarılmasının rəmzi mesajı verildi. Bu müsahibə vasitəsilə beynəlxalq aləmə bir daha Azərbaycan həqiqətləri çatdırıldı, Cənubi Qafqazda baş verənlər olduğu kimi dünya mediasının gündəminə daşındı”, - deyə Anar Məmmədov fikirlərini tamamlayıb.
Bölmənin digər xəbərləri
