Ermənistandan hər hansı bir ciddi təhlükə olarsa, dərhal dəf ediləcək - ŞƏRH
Bakı, 16 yanvar, AZƏRTAC
Bu gün Azərbaycan Silahlı Qüvvələrinin yenidən təşkilatlanması, xüsusən də ordumuzun Türkiyənin milli modelinə uyğunlaşdırılması həyata keçirilir. 44 günük Vətən müharibəsindən sonra Silahlı Qüvvələrimiz elə bil səviyyəyə çatıb ki, dünyanın hərbi beyin mərkəzləri və hərbi akademiyaları ordumuzun apardığı uğurlu hərbi əməliyyatları təhlil edirlər. Onlardan biri də pilotsuz uçuş aparatlarının müharibələrdə kütləvi şəkildə istifadəetmə taktikasıdır. Eləcə də xüsusi təyinatlılarımızın Şuşa əməliyyatı və ordumuzun 30 il müddətində möhkəmləndirilmiş ön xətti yarması, xüsusən “AN-2” təyyarələrindən aldadıcı manevr işlətməklə düşmənin hava hücumundan müdafiə sistemlərinin yerinin aşkarlanması və sıradan çıxarılması taktikası xarici hərbi akademiyalar tərəfindən öyrənilir və öz ölkələrinin silahlı qüvvələrində tətbiq edilir.
Bu barədə ehtiyatda olan polkovnik-leytenant, hərbi ekspert Elxan Şıxəliyev AZƏRTAC-a açıqlamasında Prezident İlham Əliyevin yerli televiziya kanallarına müsahibəsində ölkəmizdə ordu quruculuğu, eləcə də Azərbaycan Silahlı Qüvvələrinin Ermənistandan hərbi üstünlüyü barədə səsləndirdiyi fikirləri şərh edərkən danışıb.
O qeyd edib ki, bu gün Azərbaycan dünyada müstəqil siyasət aparır, öz sözünü açıq deyir. Bunun təməlində həm hərbi güc, həm də Vətən müharibəsində Qələbə amili dayanır. Hazırda Azərbaycan Ordusunun Ermənistandan dəfələrlə hərbi üstünlüyü mövcuddur. Xüsusən 2022-ci ilin nəticəsi kimi, dünya miqyasında silahlı qüvvələrin qiymətləndirilməsi üzrə beynəlxalq indeksləşmə qurumu olan “Global Firepower” portalının məlumatına əsasən, Azərbaycan Silahlı Qüvvələri hərbi gücünə görə 57-ci yerdə, Ermənistan ordusu isə beynəlxalq reytinqə görə 94-cü yerdə qərarlaşıb. Hazırda dünya hərbi beyin mərkəzlərinin istinad etdiyi və qiymətləndirmə göstəricisi bu indeksdir. Nəticə etibarilə 2023-cü ilin əvvəlində Azərbaycan Silahlı Qüvvələri Ermənistan ordusunu 37 pillə qabaqlayır. Yəni Azərbaycanla Ermənistanın güc nisbəti 37:1-dir. Nəzərə alsaq ki, bu reytinqin tərtib olunması zamanı orduların silah sənayesindəki texnoloji inkişafı, maliyyə vəziyyəti, maddi-texniki imkanları və çevikliyi kimi cəhətlər qiymətləndirilir, onda görərik ki, hərbi gücümüz Ermənistan ordusundan 37 dəfə üstündür.
Hərbi ekspertin sözlərinə görə, digər məsələ həmin reytinqdə 145 ölkə arasında 60 meyar üzrə qiymətləndirmə aparılması göstərir ki, Azərbaycan Silahlı Qüvvələri dünyanın artıq 145 ölkəsinin ən azı 3:1-dən döyüş hazırlığına və yüksək hərbi texnoloji parka malik olmaqla üstündür. Ordumuz iqtisadi və maliyyə resursları olan Silahlı Qüvvələrdir. Ordumuzun reytinqə görə 11-ci sırada qərarlaşan Türkiyənin mini modelinə keçidi, xüsusən də Şuşa Bəyannaməsindən sonra qardaş ölkənin silahlı qüvvələri ilə inteqrasiyası çox sürətlə aparılacaq. Ötən il Türkiyə ilə birgə keçirilmiş 20-yə yaxın təlim və ilin sonunda “Qardaş yumruğu” təlimi ilə bunlara yekun vurulması o deməkdir ki, artıq bu regionda Türkiyənin hərbi təhlükəsizliyi Azərbaycanın hərbi təhlükəsizliyi kimi qəbul olunur.
“Düşünürəm ki, bu müttəfiqliyimiz də 2023-cü ildə daha da möhkəmlənəcək. Xüsusən silahlı qüvvələrimizdə yeni komando briqadaları yaradılır, xüsusi təyinatlılarımızın sayı iki dəfə artırılıb. Bölmələrin bütün təminat və təchizatının müasir ordulardakı ən yüksək səviyyəyə qaldırmaq istiqamətindəki atılan addımlar artıq yaşadığımız regionda Silahlı Qüvvələrimizin yerinə yetirə bilməyəcəyi heç bir tapşırığın qalmayacağını nümayiş etdirir. Yəni, biz yaxın zamanda mümkün ola biləcək təhdid və təhlükələri qısa zamanda aradan qaldıracaq və bütün döyüş tapşırıqlarını yüksək keyfiyyətlə yerinə yetirəcək orduya malik olacağıq. Beləliklə, Azərbaycan Silahlı Qüvvələri 2023-cü ildə dövlətin əsas prioritetlərindən biri olacaq”, - deyə hərbi şərhçi əlavə edib.
Polkovnik-leytenant bildirib ki, bu il Ermənistan üçün sonuncu şans olacaq. Belə ki, Azərbaycan Ermənistandan özünə qarşı hər hansı bir ciddi təhlükə təsbit etsə, bunu dərhal dəf edəcək. İkinci Qarabağ müharibəsi başa çatdıqdan sonra Azərbaycanın Ermənistan tərəfinə göndərdiyi siqnallar da ondan ibarət idi ki, siz bu vəziyyətlə barışmalısınız. Ancaq Ermənistan həm Qarabağda, həm sərhəd istiqamətində planlarından əl çəkmədi və nəticəsi də məlumdur. Azərbaycan son bir ildə - martdan bəri üç dəfə göstərdi ki, hər hansı bir erməni havadarı onların yardımına yetişə bilməz.
E.Şıxəliyev hesab edir ki, xüsusən 2023-cü ildə dövlət büdcəsindən ordumuza ayrılan maliyyə vəsaitinin 16 faiz artırılması hələ Vətən müharibəsindən sonrakı mərhələdə bu regionda təhdid və təhlükələrin tam yox olmadığını göstərir. Yəni təhdid və təhlükələrin bu coğrafiyada hər zaman mümkünlüyünü nəzərə alaraq, bizim təhlükəsizliyimizin güclü ordu quruculuğundan asılı olduğunu dərk edirik. Dövlətimizin başçısı da yerli televiziya kanallarına müsahibəsində əsasən bunu vurğuladı. Əgər Silahlı Qüvvələrimiz bu il prioritet sahə kimi qalacaqsa, deməli, milli təhlükəsizliyimiz və müdafiə qabiliyyətimiz də mühüm məsələlərdən biri olacaq. Azərbaycanla təhdid dilində danışan düşmən ölkələrə mesaj isə bundan ibarətdir ki, bizə qarşı təxribat törətməyi planlaşdırarkən bu sadalanan statistikanı nəzərə alsınlar və ordumuzun ərazi bütövlüyümüzə qarşı mövcud ola biləcək təhdid və təhlükələri hər zaman aradan qaldıracaq gücə malik olması ilə barışsınlar.
Bölmənin digər xəbərləri
