Ermənistanın işğalçı qoşunlarının Azərbaycan ərazilərində mövcudluğu regionda qeyri-sabitliyin mənbəyidir
Bakı, 1 aprel, AZƏRTAC
Martın 31-də “La Francophonie” təşkilatının Parlament Assambleyasının Yerevanda keçirilən iclasında çıxış edən Ermənistanın xarici işlər naziri Edvard Nalbandyanın fikirlərini şərh edən Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev deyib: “Çox nadir bir hal olsa da “soyqırımlar erasının bitmədiyini” iddia edən Ermənistan xarici işlər naziri ilə razılaşmaq olar. Erməni daşnak və bolşevik qüvvələri tərəfindən 1918-ci ilin martında Bakı, Şamaxı, Quba və digər şəhərlərdə azərbaycanlılara qarşı törədilmiş dəhşətli soyqırımı əməllərinə baxmayaraq, Ermənistanın Azərbaycan xalqına qarşı soyqırımı və qanlı etnik təmizləmə siyasəti daha dəhşətli formada XX əsrin sonunda Ermənistan ərazisində - azərbaycanlıların öz tarixi torpaqlarında və işğal edilmiş Azərbaycan ərazilərində davam etdirilib. Martın 31-də - azərbaycanlıların soyqırımı günü beynəlxalq auditoriya qarşısında “soyqırımı” mövzusunu yenə də siyasi möhtəkirlik obyektinə çevirən Ermənistan xarici işlər nazirinin azərbaycanlılara qarşı törədilmiş 1918-ci ilin qanlı mart hadisələrinə və işğal edilmiş Azərbaycan ərazilərində Ermənistan tərəfindən törədilmiş müharibə cinayətlərinə, insanlıq əleyhinə cinayətlərə və soyqırımı əməllərinə qiymət verməsi və ölkəsinin məsuliyyətini etiraf etməsi daha ciddi davranış olardı”.
Mətbuat xidmətinin rəhbəri bildirib ki, bu kimi soyqırımı əməllərinin törədilməsinə görə bilavasitə məsuliyyət daşıyan Ermənistanın BMT-nin İnsan Hüquqları Şurasında soyqırımının qarşısının alınması adlı qətnamənin təşəbbüskarı roluna iddia etməsi beynəlxalq ictimaiyyətə və beynəlxalq təsisatlara qarşı hörmətsizliyin nümunəsidir.
Münaqişənin həllindən danışan Ermənistan xarici işlər naziri ölkəsinin Böyük sülh sazişi üzrə işə başlamaqdan imtina etməsinə, ATƏT-in Minsk qrupunun həmsədrlərinin də tələb etdiyi kimi, Ermənistanın öz işğalçı qoşunlarını zəbt edilmiş Azərbaycan ərazilərindən çıxarmamasına, itkin düşmüş şəxslərin taleyi barədə məlumat mübadiləsinə və Azərbaycanın Dağlıq Qarabağ bölgəsinin azərbaycanlı və erməni icmaları arasında təmaslara imkan verməməsinə aydınlıq gətirməsi daha düzgün olardı.
Ermənistan xarici işlər naziri hər fürsətdə ATƏT-in Minsk qrupunun həmsədrlərinin güc tətbiq etməmək və ya güc tətbiq edərək hədələməmək, dövlətlərin ərazi bütövlüyü və xalqların öz müqəddəratını təyinetmə barədə çağırışlarını təhrif edilmiş formada təqdim etməyə çalışır. Birincisi ardıcıllıq bu formada olsa da, yəni güc tətbiq etməmək və ya güc tətbiq edərək hədələməmək, dövlətlərin ərazi bütövlüyü və xalqların öz müqəddəratını təyinetmə, diplomatik və siyasi etikadan kənar formada Nalbandyan tərəfindən xalqların öz müqəddəratını təyinetmə ərazi bütövlüyündən əvvəl təqdim olunur.
“E.Nalbandyana xatırlatmaq istərdik ki, prinsiplərin bu formada ardıcıllığı Helsinki Yekun Sənədindən irəli gəlir, bu ardıcıllıq əsnasında Helsinki sənədində ərazi bütövlüyünün prioritetliyi ön sıraya çəkilir və xalqların öz müqəddəratını təyinetmə prinsipinin ərazi bütövlüyünə uyğun şəkildə ifadə olunması təsbit olunur. Ümumiyyətlə, xalqların öz müqəddəratını təyinetmə prinsipinə gəldikdə isə, rəsmi Bakı dəfələrlə bəyan edib ki, Ermənistanın işğalçı qoşunları Azərbaycan ərazilərindən çıxarıldıqdan sonra Azərbaycan sərhədləri daxilində Azərbaycanın Dağlıq Qarabağ bölgəsinin erməni və azərbaycanlı icmaları öz müqəddəratını müəyyən edə bilərlər”, - deyə Hikmət Hacıyev qeyd edib.
Mətbuat katibi vurğulayib ki, güc tətbiq etməmək və ya güc tətbiq edərək hədələməmək prinsipindən çox danışan Ermənistan tərəfi hələ də anlamır ki, bu prinsipdən irəli gələn şərtlərin icra edilməsi məsuliyyəti də bilavasitə Ermənistana aiddir. Hərbi güc tətbiq edərək, Azərbaycanın ərazilərini işğal edən tərəf Ermənistandır. Azərbaycanın işğal edilmiş ərazilərində çoxsaylı hərbi kontingent saxlayaraq, hədə doğuran tərəf də məhz Ermənistandır. Ermənistanın işğalçı qoşunlarının Azərbaycan ərazilərində mövcudluğu güc tətbiq etmək və güc tətbiq edərək hədələməyin bariz ifadəsi olaraq, regional sülh və təhlükəsizlik üçün ən başlıca təhdiddir və qeyri-sabitliyin mənbəyidir.
Ermənistanın Azərbaycana qarşı işğal və təcavüzü aradan qaldırıldıqdan və Ermənistan qoşunları zəbt olunmuş Azərbaycan ərazilərindən çıxarıldıqdan sonra regionda sülh və sabitlik bərqərar ola bilər.
Bölmənin digər xəbərləri
