Ermənistanın ölkəmizə qarşı təxribatları ona bəladan başqa bir şey gətirməyəcək - Ekspert rəyləri
Bakı, 12 aprel, AZƏRTAC
Xəbər verildiyi kimi, aprelin 11-i saat 16:20 radələrində Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətindəki üzbəüz mövqelərini müxtəlif çaplı silahlardan istifadə etməklə atəşə tutub. Daha sonra qarşı tərəf minaatan və iriçaplı silahlardan da istifadə etməklə mövqelərimizi atəşə tutmaqda davam edib. Hərbi qulluqçularımızın sayıqlığı nəticəsində Ermənistan tərəfinin təxribatının qarşısı qətiyyətlə alınıb, atəş mövqeləri susdurulub.
Bununla bağlı AZƏRTAC-a açıqlamasında Cəmiyyətin İnkişafı Mərkəzi İctimai Birliyinin sədri Əhməd Abbasbəyli bildirib ki, Azərbaycan sərhədlərində Laçın rayonu ərazisində baş vermiş hadisə - silahlı qarşıdurma həm hiddət, həm də təəssüf hissi doğurur. Əslində, son zamanlar Fransanın proseslərə qeyri-obyektiv, ədalətsiz münasibətlərindən və davranışlarından həvəslənən, az qala ekstaza gələn Ermənistanın ritorikası, imkanlarına uyğun gəlməyən ambisiyaları gec-tez bu cür təxribatları qaçılmaz edirdi.
Əhməd Abbasbəylinin sözlərinə görə, Ermənistan anlamalıdır ki, qisasçılığa və ifrat nasizmə köklənmiş bu cür məsuliyyətsiz, həyasız, fürsətcil, davranışları Ermənistan dövlətini və erməni xalqını daha böyük təhlükələrə sürükləyir, regionun yeni bir qarşıdurma ocağına çevrilməsinə səbəb olur. Ermənistan törətdiyi cinayətlərə görə mütləq cavab verəcək.
Azərbaycanın bütün mümkün vasitələrlə Ermənistana hər iki xalq üçün məqbul ola biləcək şərtlər təklif etdiyini söyləyən siyasi şərhçi Azər Həsrət bildirib ki, Ermənistan üzdə bunu qəbul edirmiş kimi göstərsə də, arxada özünə dəstək olan digər dövlətlərlə məsləhətləşmələr aparıb, tamamilə başqa hərəkətlər edir, təxribatlar törədir. Ona görə də biz Azərbaycan tərəfi olaraq sərhədlərimizi və ərazi bütövlüyümüzü qorumaq üçün bundan sonrakı müddətdə də hərbi qüdrətimizi artırmalıyıq. Bizim buna gücümüz çatacaq. Ermənistanın isə bunu bacaracağı sual altındadır. Çünki çökmüş bir dövlətin yenidən Azərbaycanla müharibəyə girməsi axmaqlıqdan başqa bir şey deyil. Paşinyanın davranışları məhz axmaqlıq kimi qiymətləndirilə bilər.
“Əgər arada hansısa anlaşılmazlıq, sərhədlə bağlı qeyri-dəqiqlik varsa, bunun həlli yolu insanları öldürməkdən keçmir. Bunun həlli masa arxasında Azərbaycanın təklif etdiyi qaydada oturub müzakirələr aparmaqdan keçir. Ermənistan bunu anlamırsa, əlbəttə, itkiləri çox olacaq. İstənilən silahlı qarşıdurmada həmişə Ermənistan bizdən sayca daha çox canlı qüvvə itirib. Bunu anlamamaq həqiqətən də axmaqlıqdır. Buna görə də düşünürəm ki, Azərbaycan öz “Dəmir yumruğ”unu daim havada saxlamalıdır. Düşmən anlamalıdır ki, bizimlə güc dili ilə danışmaq onlara bəladan başqa bir şey gətirməyəcək”, - deyə Azər Həsrət qeyd edib.
Milli Məclisin deputatı Vüqar Bayramov isə AZƏRTAC-a açıqlamasında bildirib ki, Azərbaycan Qafqazda sülhün və sabitliyin formalaşmasında maraqlı ölkədir. Vurğulanıb ki, bu baxımdan Azərbaycan 44 günlük Vətən müharibəsindən sonra Ermənistana beş bəndlik sülh təklifi təqdim edib. Amma çox təəssüf ki, Ermənistanda revanşist meyllər yenə güclənib. Ermənistan tərəfinin dünənki təxribatı ondan xəbər verir ki, onlar revanşist olaraq bütövlükdə bölgədə sülhə deyil, belə qarşıdurmaların yaranmasında maraqlıdır. Azərbaycan Ordusu Ali Baş Komandanın rəhbərliyi ilə istənilən təxribata cavab vermək gücündədir. Dünənki hadisə bir daha təsdiq etdi ki, Azərbaycan Ordusu bütün təhdidlərə, təxribatlara çevik və operativ cavab verib.
“Sülh müqaviləsi bağlanmadıqca belə təxribatların olma riski yüksəkdir. Amma bu təxribatların qarşısını alacaq güclü Azərbaycan Ordusu var. Gələcəkdə belə təxribatların baş verəcəyi halda, həmin təxribatların qarşısı da yerində və vaxtında alınacaq”, - deyə Milli Məclisin deputatı qeyd edib.
Bölmənin digər xəbərləri
