SİYASƏT
Estoniyada yaşayan azərbaycanlı üçüncü dəfə parlamentin deputatı seçilmişdir
Bakı, 7 mart (AZƏRTAC). Estoniyada yaşayan azərbaycanlı, Estoniya Mərkəzçi Partiyasının nümayəndəsi Eldar Əfəndiyev üçüncü dəfə bu ölkənin parlamenti Riyqikoqun deputatı seçilmişdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, E.Əfəndiyev Gertsen adına Leninqrad Dövlət Pedaqoji İnstitutunu bitirmişdir. Narva muzeyinin direktoru, Narva şəhərinin meri, Estoniya hökumətində əhalinin məskunlaşması işləri üzrə nazir olmuşdur. Estoniya parlamentinin X və XI çağırışlarının deputatı seçilmişdir.
Avropa Azərbaycanlıları Konqresinin birinci vitse-prezidenti və Dünya Azərbaycanlıları Konqresi idarə heyətinin üzvü olan həmyerlimiz xidmətlərinə görə bir neçə dövlət mükafatlarına layiq görülmüşdür.