FACİƏLƏRİMİZİN BAŞLICA SƏBƏBİ UNUTQANLIĞIMIZDIR
Bakı, 1 aprel (AZƏRTAC). “Faciələrimizin başlıca səbəbi unutqanlığımızdır”. Bu sözlər AMEA-nın İqtisadiyyat İnstitutunda erməni cəlladları tərəfindən dinc azərbaycanlı əhaliyə qarşı törədilən 31 mart soyqırımının 92-ci ildönümü münasibətilə keçirilən anma mərasimində səslənmişdir.
İnstitutun direktoru, professor İsa Alıyev erməni millətçiləri tərəfindən əsrlər boyu soyqırımı və deportasiyaya məruz qalmış xalqımızın başına gətirilən müsibətlər barədə danışmış, bu cinayətlərin dünya ictimaiyyəti və beynəlxalq təşkilatlar tərəfindən tezliklə həqiqi qiymətini alacağına əminliyini bildirmişdir.
AMEA-nın müxbir üzvü, professor Şahbaz Muradov mənfur planlarını həyata keçirən ermənilərin Bakı quberniyası və digər ərazilərimizi azərbaycanlılardan təmizləmək məqsədilə milli mənsubiyyətinə görə dinc əhaliyə misli görünməmiş amansızlıqla divan tutmasından danışmışdır.
Hazırda Ermənistanın işğalı altında olan torpaqlarımızın azad olunması üçün Azərbaycanın haqq səsinin, erməni vəhşilikləri barədə həqiqətlərin dünya ictimaiyyətinə çatdırılmasının hər bir ziyalının mənəvi borcu olduğu vurğulanmışdır.
Bölmənin digər xəbərləri
