Fireland Azərbaycanlılar Birliyi Belçikada beynəlxalq şahmat turniri təşkil edib
Brüssel, 22 fevral, AZƏRTAC
Azərbaycanın Belçikadakı Səfirliyinin dəstəyi, Fireland Azərbaycanlılar Birliyinin təşkilatçılığı ilə Brüsseldə III Beynəlxalq Şahmat Turniri təşkil edilib.
AZƏRTAC xəbər verir ki, “Dostluq qazansın” şüarı altında keçirilən turnir 15 ölkədən 50-yə yaxın şahmatçını bir araya gətirərək beynəlxalq dostluğun, mədəni dialoqun və idman həmrəyliyinin gücləndirilməsinə töhfə verib.
Tədbirin rəsmi hissəsində Azərbaycanın Belçikadakı Səfirliyinin 1-ci katibi Emin Rüstəmov çıxış edərək turnirin əhəmiyyətindən bəhs etdi, Belçikada fəaliyyət göstərən Azərbaycan diaspor təşkilatlarının təşkil etdiyi bu qəbildən olan layihələrin icmalar arasında dostluq və mədəni əlaqələrin inkişafı nöqteyi-nəzərindən vacibliyini vurğuladı.
Fireland Azərbaycanlılar Birliyinin həmtəsisçisi Elşən Tağıyev çıxışında artıq 3-cü dəfədir “Dostluq qazansın” şüarı altında təşkil edilən turnir haqqında ətraflı məlumat verib. O, İldən-ilə iştirakçı sayının və turnirdə təmsil olunan ölkələrin sayının artmasını turnirə olan böyük marağın təzahürü kimi qiymətləndirib.
Tədbirdə Belçikada fəaliyyət göstərən şahmat məktəblərinin nümayəndələri, Belçika universitetlərində təhsil alan əcnəbi tələbələr, diplomatlar, eləcə də Azərbaycan icmasının üzvləri iştirak ediblər. Turnir yalnız yarış deyil, həm də müxtəlif millətlərdən olan iştirakçılar arasında dostluq və əməkdaşlığın möhkəmləndirilməsi üçün mühüm platforma oldu.
Turnirdə iştirak edən Anderlext bələdiyyəsinin şahmat klubunun üzvü Sedrik Sohet iştirak etdiyi 40-dan çox turnir arasında bu turnirin ən yadda qalan olduğunu və ilk dəfə bu qədər çox şahmat həvəskarının bir araya gəldiyinin şahidi olduğunu bildirib, təşəbbüs və təşkilatçılıq üçün təşəkkür edib.
Uğurlu təşkilatçılıq və turnirin miqyasının genişlənməsi fonunda Fireland Şahmat Klubunun üzvləri bu il Brüsseldə keçiriləcək digər beynəlxalq şahmat turnirə dəvət olundu.
Belçika, Fransa, Meksika, Rumıniya, Qazaxıstan və İndoneziyanı təmsil edən iştirakçılar müxtəlif kateqoriyalarda turnirin qalibi adını qazandılar.
Turnirin sonunda bütün iştirakçılara sertifikat və medallar təqdim edildi, qaliblər kubok, sertifikat və hədiyyələrlə mükafatlandırıldı.
Vüqar Seyidov
AZƏRTAC-ın xüsusi müxbiri
Brüssel
Bölmənin digər xəbərləri
