Fransa Qran-Prisi Mavi sahildə küçə yürüşü ilə yenidən keçirilə bilər
Bakı, 14 iyul, AZƏRTAC
Formula 1 çempionatının ən problemli uik-endlərindən biri olan Fransa Qran-Prisi seriyaların təqvimində heç cür sıx qərarlaşa bilmir. 1990-cı və 2000-ci illərin əvvəllərində bu mərhələ “Manyi Kur” avtodromunda keçirilirdi, onillik fasilədən sonra isə “Pol Rikar”a qayıtdı. Lakin orada da uzun müddət davam gətirə bilmədi və 2023-cü ildə artıq Fransa Qran-Prisi keçirilmir. Bu mərhələnin qayıtması istisna olunmur, lakin o, yeni şəhərdə keçirilə bilər.
AZƏRTAC “RMS Sports” portalına istinadla xəbər verir ki, Fransanın idman naziri Ameli Udea-Kastera bu ölkənin avtomobil federasiyası qarşısında Formula 1 Qran-Prisinə qayıtmaq vəzifəsini qoyub. Potensial variantlardan biri Nitsa şəhəridir və burada küçə trasını abadlaşdırmaq istəyirlər. Fransa prezidenti Emmanuel Makron bu layihəni dəstəkləyir. O, Fransanın avtomobil federasiyasının başçısı Nikolya Deşo və əvvəllər “Pol-Rikar”da işləmiş Nitsa meri Kristian Estroziyə Mavi sahildə yürüşün layihəsini hazırlamağı tapşırıb.
Layihə ilə bağlı heç bir detallı məlumat yoxdur, lakin gözlənilir ki, Nitsa şəhərində Fransa Qran-Prisinin təsdiq olunacağı təqdirdə Mavi sahildə yürüş artıq 2025-ci ildə keçirilsin.
Bölmənin digər xəbərləri
