Fransada dövlət sektoru işçiləri tətil elan ediblər
Paris, 2 aprel, AZƏRTAC
Fransada dövlət qulluğu işçiləri aprelin 3-də milli səviyyədə tətil hərəkatı olacağını elan ediblər.
AZƏRTAC xəbər verir ki, həmkarlar ittifaqları milli tətil günü ilə bağlı hazırlıqlar aparır. Həmkarlar ittifaqları milli tətil hərəkatı çərçivəsində dövlət qulluqçularının tələblərini eşitdirmək üçün dövlət sektoru daxilində səfərbərliyə çağırış edib. Tətil çərçivəsində bir çox xidmətlər, xüsusilə də məktəblərin fəaliyyəti dayandırılacaq, bir çoxu bağlanacaq.
Tələblər martın 18-də təqdim edilib: ölkənin bütün ərazisində, eləcə də dənizaşırı ərazilərdə əhalinin hüquqlarını təmin edən və tələbatını ödəyən dövlət xidmətləri və dövlət qulluğu; indeks bəndinin dəyərinin artırılması və ümumi əmək haqqı göstəricilərinin artması; xəstəlik məzuniyyəti zamanı əməkhaqqının 10% azaldılmasının aradan qaldırılması; maaş cədvəlinin əsaslı şəkildə dəyişdirilməsi; qadınların və kişilərin əməkhaqqının bərabərliyinin təmin edilməsi; dövlət məmurlarının sosial müdafiəsi və fəaliyyət siyasəti çərçivəsində hüquqlarının təmin edilməsi.
Bölmənin digər xəbərləri
