Gənc Tamaşaçılar Teatrında “Şəhidlər ölməz, Vətən bölünməz!” adlı mərasim keçirilmişdir
Bakı, 18 yanvar (AZƏRTAC). Yanvarın 18-də Azərbaycan Dövlət Gənc Tamaşaçılar Teatrında “Şəhidlər ölməz, Vətən bölünməz!” adlı anma mərasimi keçirilmişdir.
Əvvəlcə 20 Yanvar şəhidlərinin əziz xatirəsi birdəqiqəlik sükutla yad edilmişdir.
Tədbirdə çıxış edən teatrın direktoru Mübariz Həmidov 20 Yanvar faciəsinin 21-ci ildönümü ərəfəsində keçirilən mərasimin Azərbaycanın azadlığı, müstəqilliyi və ərazi bütövlüyü uğrunda döyüşlərdə şəhid olan Vətən övladlarının əziz xatirəsinə həsr olunduğunu diqqətə çatdırmışdır.
Dünya Azərbaycanlıları Konqresinin sədri Qulamrza Səbri Təbrizi, Dövlət Gənc Tamaşaçılar Teatrının baş rejissoru Cənnət Səlimova və başqaları 20 Yanvar hadisələrini öz azadlığı, müstəqilliyi, ölkəsinin ərazi bütövlüyü uğrunda mübarizə aparan xalqımızın tarixində şanlı səhifə kimi səciyyələndirmişlər.
Mərasimdə şəhidlərə həsr olunmuş şeirlər söylənmiş, faciəni əks etdirən videoçarx nümayiş etdirilmişdir.
Anma tədbirinin rəsmi hissəsindən sonra yazıçı-dramaturq Tamara Vəliyevanın “Mənim ağ göyərçinim” tamaşası göstərilmişdir.
Bölmənin digər xəbərləri
