GİMNASTLARIMIZ BEYNƏLXALQ YARIŞLARA HAZIRLAŞIRLAR
Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, toplantıda əsas diqqət idmançıların xüsusi və ümumi fiziki hazırlıq səviyyələrinin yüksəldilməsinə yetirilir. Məşqlərdə çıxış proqramına daxil olan ayrı-ayrı elementlərin yerinə yetirilməsi təkmilləşdirilir. Bunlar beş lentlə, iki cüt gürzlə, üç çənbərlə yerinə yetirilən təmrinlərdir. Birinci kompozisiya üçün musiqi müşayiəti kimi Düponun müasir melodiyaları, ikinci kompozisiya üçünsə N.Şirinovun “Nağara”sı ilə F.Əmirovun “1001 gecə” baletinin sintezi seçilmişdir.
Xatırladaq ki, Azərbaycan komandasına qrup təmrinlərinin quruluşunda bədii gimnastika üzrə Rusiya yığma komandasının məşqçiləri İnna Bıstrova və Natalya Laşşinskaya kömək etmişlər. Onlar bu ilin yanvarında Bakıda bir həftə ustad dərsləri keçmişlər.
Noyabrda Həştərxanda Rusiya gimnastları ilə birgə məşqlər keçirmək də nəzərdə tutulmuşdur.
Komandanın əsas vəzifəsi gələn ilin may və oktyabr aylarında Bakıda keçiriləcək AGF kuboku yarışlarına və dünya çempionatına hazırlaşmaqdır.
Bölmənin digər xəbərləri
