Bakı, 21 iyun, Rauf Hacıyev, AZƏRTAC

Odunla qalanmış dəmir sac üstündə, arası ətirli dağ göyləri ilə bol, içərisi xalis xamalı, üzəri sumaxlı olan dadlı kətə, həmçinin bulaq suyundan və ətirli çiçəklərdən dəmlənmiş bir çaynik pürrəngi çay, bir də sərin, saf dağ havası və insanı valeh edən təbiət mənzərələri... Bu unudulmaz, amma çox ucuz başa gələn istirahət üçün elə də uzağa getməyə ehtiyac yoxdur.

Hər gün işə tələsən və hələ məzuniyyətə çıxmağa macal tapmayan, lakin heç olmasa qızmar yayda həftə sonları şəhərin can qovuran istisindən və səs-küyündən uzaq olmaq istəyən, istirahətini harada və necə keçirəcəyini düşünən hər kəs üçün belə məkanlardan biri də Göygöldür. AZƏRTAC-ın əməkdaşının Göygöl təəssüratlarını təqdim edirik.

Təbiətin yurdumuza bəxş etdiyi Göygöl və Maralgöl, (əslində bu ərazidə bir-birindən gözəl 17 bu cür göl var) və bu ətrafdakı məkanlar - Aşıqlı, Hacıkənd, Toğanalı, Sarısu yalnız cənnətin yer üzündəki bir parçası deyil, həm də Gəncəbasar sakinlərinin, yerli və xarici turistlərin xüsusən qızmar yay günlərində ən çox üz tutduğu, istirahət etdiyi məkanlardır.

Hər fəslin özünə görə qayğısı var. Yay fəslinin qovurucu istiləri xüsusən şəhər mühitində yaşayanlar üçün ayrıca bir qayğıya çevrilir. Ona görə də bu yay günlərində çoxlarını öz istirahətini harada və necə, həm də daha ucuz keçirməsi düşündürür. İndi ölkəmizdə müxtəlif istiqamətlərə, bir-birindən gözəl təbii və tarixi məkanlara turizm marşrutları fəaliyyət göstərsə də, Hacıkənd-Göygöl istiqaməti üzrə səyahət daha ucuz və sərfəlidir.

Qeyd edək ki, bu tərəflər vaxtını dəbdəbəli otellərdə keçirən, müxtəlif xidmətlərin təklif olunduğu, masada adlarını çoxunun tələffüz etməkdə çətinlik çəkdiyi qəlyanaltıların, salatların, xörəklərin və içkilərin düzüldüyü, avropasayağı istirahətə üstünlük verənlərin məkanı deyil.

Göygöl və ətrafdakı ərazilər bu yerlərə üz tutan hər kəsin buradakı təbii gözəlliklərdən və təklif olunan xidmətlərdən yararlana biləcəyi əsl istirahət məkanıdır. İstirahət isə bu yerlərə səyahət edənlərin büdcəsindən və seçimindən asılıdır. Lakin bütün hallarda hər kəsi eyni - xoş, mənalı və yaddaqalan istirahət gözləyir.

Haradan gəlməyinizdən asılı olmayaraq Göygöl şəhərindən üzü Hacıkənd-Göygöl istiqamətinə qalxdıqdan beş dəqiqə sonra avtomobilinizin kondisionerini söndürəcək, pəncərəsini isə aşağı endirəcəksiniz. Çünki dağ yolu ilə yüksəkliyə qalxdıqca qarşınızda açılan bir-birindən gözəl təbiət mənzərələri və sərinləyən hava sizi buna vadar edəcək. Çox keçmədən Gəncə, yaxud Göygöl şəhərindən fərqli olaraq burada 10-15 dərəcə aşağı temperaturu hiss edəcəksiniz.

Hacıkənd-Göygöl yolu çoxlu dolaylardan keçən dağ yolu olsa da, şəxsi avtomobilində texniki nasazlığı olmayan və idarəetməni bacaran heç kəs üçün bu yolda hər hansı ekstrim gözlənilmir.

Göygöl şəhərindən aralanınca beş dəqiqədən sonra rayonun Aşıqlı kəndinə çatacaqsınız. Yolboyu cərgələnən kənd evlərinin qarşısında qoyulmuş piştaxtaların üzərində bu yerlərdə bitən və kəndlilərin özü tərəfindən hazırlanmış müxtəlif məhsulların düzüldüyünü görəcəksiniz. Bu kəndin sakinləri istirahətə gələnlərə xalis beçə balı, qaymaq, nehrə yağı, qoyun pendiri, isti təndir çörəyi, yuxa, hər cür xəstəliyin müalicəsində istifadə olunan qurudulmuş dağ çiçəkləri, şəfalı otlar, bu dağlarda bitən moruq, böyürtkən, qarağat, zoğal, itburnu və bənövşədən bişirdikləri mürəbbələri, bir də cacıx, baldırğan, çaşır, quşəppəyi və hər cür meyvədən hazırladıqları çeşid-çeşid turşuları və daha nələri təklif edirlər. Gündəlik dolanışığı həyət-bacasındakı məhsulların satışından çıxan zəhmətkeş kənd qadınlarının hazırladıqları bu nemətlər elə dadlı olur ki, onları yeməklə doymaq olmur. Ona görə də yaxşı olar ki, bu nemətləri səfərinizdən geri qayıdarkən alasınız.

Bu yol üstündə növbəti kənd çoxunun yaxşı tanıdığı Hacıkənddir. Yay gəlincə dağ yolu üstündəki meşəliklərdə müxtəlif adlarla fəaliyyət göstərən ailəvi istirahət və əyləncə mərkəzlərinin, restoranların müştərisi artır. Axşama yaxın meşədəki ağaclar altında, açıq havada quraşdırılmış kotteclərdə istirahətə gələnlərin çoxluğundan elə də asan yer tapmaq olmur. Bütün məkanlarda təxminən eyni, yəni milli mətbəximizin ən dadlı nümunələri, xüsusən kabablar təklif olunur. Elə istirahətə gələnlər də daha çox kabab sifariş edirlər. Burada kabab yeyən hər kəs bilir ki, bu yerlərin kababı bir başqa ləzzətdə olur. Kimisi bunu işini daha yaxşı bilən kababçı ilə, kimisi də qoyunların qidalandığı zəngin otlarla əlaqələndirir. Kiçik Qafqazın təbiətinə yaxşı bələd olanlar deyirlər ki, ölkəmizdə mal-qaranın qidalanması üçün müəyyən edilmiş 640 cür çəmən-yaylaq bitkisindən 510-nu bu yaylaqlarda bitir. Bitkilərin əksəriyyəti şirin, dadlı və şəfalı otlar olduğundan buradakı qoyunların ətindən bişirilən kabablar da daha dadlı və ləzzətli olur.

Hacıkənd-Göygöl səfərinizi daha yaddaqalan etmək istəsəniz Hacıkənd bulağından su içə, “Sələflər və xələflər” parkında gəzə, sifarişlə aşıq musiqisi dinləyə, yaxud kənd uşaqları tərəfindən bir manata təklif olunan daha bir xidmətdən - at üstündə şəkil çəkdirmək və meşə gəzintisindən istifadə edə bilərsiniz.

Yol üzərindəki ən səfalı məkanlardan biri Toğanalı kəndidir. Bu məkana gedənədək yolunuz dolaylardan keçir. Yuxarı qalxdıqca hava daha da sərinləyir, meşələrin sıxlığı artır. Bu yerlərdə yüksək dağ uçurumlarından qopmuş iri qayalar üzərində bitən hündür ağaclar, dibigörünməz dərələrdən axan kiçik çaylar, qol-budağı bir-birinə sarmaşan gövdəsi mamırlı, hündür və çətirli ağaclar o qədər heyrətamiz mənzərə yaradır ki, insan yolçuluğunun nə vaxt bitdiyini və Toğanalıya çatdığını hiss etmir.

Dağlarla və yamyaşıl meşələrlə əhatələnən Toğanalıda sizi qəfil tutqun və yağmurlu hava qarşılaya bilər. Lakin bunun üçün təəssüflənməyə dəyməz. Çünki dağların qoynunda yerləşən Toğanalıda gün ərzində havanın bir neçə dəfə dəyişdiyini müşahidə etmək mümkündür. Bura gəldiyinizdə bir neçə dəqiqəyə göyün üzünü örtən qara buludları və qəfil başlayan leysanı seyr edə bilərsiniz. Yağış kəsildikdə dağların arxasından göy qurşağı uzanır. Seyrələn buludların arasından boylanan Günəşin şəfəqləri əzəmətli Kəpəzin sərt qayalarında və Göygöl meşələrində bir başqa gözəllik yaradır. Beləcə qarşınızda ruhunuzu dincəldən heyrətamiz mənzərə açılır. Bu mənzərəni görəndə qeyri-ixtiyari böyük şairimiz Səməd Vurğunun misraları yadıma düşür: Göy yaylaqlar belinə qalx, Kəpəz dağdan, Göygölə bax...