Gürcüstanda avtomobil yanacağı yenidən bahalaşıb
Tbilisi, 15 avqust, AZƏRTAC
Gürcüstanda avtomobil yanacağı yenidən bahalaşıb. Son günlər ölkənin əksər yanacaqdoldurma məntəqələrində benzinin qiymətində artım müşahidə olunur.
AZƏRTAC xəbər verir ki, yanacaqdoldurma məntəqələrində yanacağın qiyməti növündən asılı olaraq 20-25 tetri (10 sent) artıb. Hazırda bəzi yanacaqdoldurma məntəqələrində bir litr benzinin qiyməti 2,95 lari, 2,75 lari və 2,50 lari arasında dəyişir.
Ekspertlərin fikrincə, bu, dünya bazarında yanacağın qiymətində baş verən artımla əlaqəlidir.
Ekspert Zaal İakobidze bildirib ki, yaxın vaxtlarda ölkədə yanacağın qiymətində yenidən artım gözlənilir. Onun sözlərinə görə, Gürcüstana ən çox yanacaq ixrac edən Rusiya bazarında son 1 ayda yanacağın 1 tonunda 100 dollardan bir qədər çox bahalaşma qeydə alınıb. Bu da yaxın vaxtlarda Gürcüstanda yanacağın qiymətinin yenidən artacağına zəmin yaradır.
Qeyd edək ki, Rusiya bu il Gürcüstanın əsas yanacaq tədarükçüsü olub. Cari ilin birinci yarısında Gürcüstan istehlak etdiyi yanacağın 81 faizini Rusiyadan alıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
