Bakı, 22 aprel (AZƏRTAC). Ulu öndərimizin müdrik siyasi kursu və zəngin idarəçilik irsi Azərbaycanın xoşbəxt gələcəyinin qarantıdır.

İllər ötdükcə dahi şəxsiyyətin böyüklüyü, xalqının xoşbəxtliyi naminə gördüyü işlərin mahiyyəti və miqyası bizlərə daha aydın və dolğun çatır. Azərbaycanın çoxəsrlik dövlətçilik tarixində özünün müstəsna əhəmiyyəti, sanbalı, nəinki bugünkü, həm də gələcək taleyinin müəyyənləşdirilməsi baxımından Heydər Əliyev epoxası və irsi bənzərsizdir. Taleyüklü hadisələrlə zəngin olan, Azərbaycanın milli intibahı kimi səciyyələnən, ən yeni tariximizə müasir dövlət quruculuğu illəri kimi daxil olan bu dövr Azərbaycanın ümummilli lideri Heydər Əliyevin adı və fəaliyyəti ilə sıx bağlıdır. Bu şanlı salnamənin hər bir səhifəsində ulu öndərimiz Heydər Əliyevin qüdrətli izi qalmışdır.

Dövlət o vaxt güclü və yenilməz olur ki, onun rəhbəri ilə xalqı arasında birlik mövcud olsun. Məhz bu birlik və həmrəylik tarixin müxtəlif dönəmlərində ölkəmizin taleyində əvəzsiz rol oynamış, xalqımızı başının üstünü almış bütün bəlalardan hifz edib qorumuşdur. Dünyanın dahi şəxsiyyətlərindən biri olan ulu öndərimiz Heydər Əliyevin bütün mənalı ömrü və fəaliyyəti doğma xalqına və Vətəninə sədaqətlə xidmətin parlaq nümunəsidir. O, fəaliyyəti dövründə daim xalqına arxalanmış, ona güvənmiş, gücünü xalqından almışdır.

Təsadüfi deyil ki, müasir Azərbaycan tarixinin ən parlaq səhifələri, xüsusən də 1969-cu ildən başlayaraq respublikamızda cərəyan edən proseslər, əldə etdiyimiz uğurların hamısı birbaşa Heydər Əliyevin şəxsiyyətindən qaynaqlanır. Müdrik siyasi xadim Azərbaycanı qüdrətli bir dövlət, xalqını güclü bir millət kimi formalaşdırmaq kimi son dərəcə çətin bir missiyanı öz üzərinə götürmüş və şərəflə yerinə yetirmişdir.

Heydər Əliyev hələ sovet rejimi şəraitində bəşəriyyətin ən aktual çağırışlarına cavab vermək iqtidarında olan müasir ruhlu yeni rəhbər nümunəsi idi. Rəhbərliyə gəlişinin ilk günündən daim xalq arasında olan, onun yaşayışı, qayğıları, problemləri və arzuları ilə maraqlanan dahi şəxsiyyət o vaxt respublikada hökm sürən rüşvətxorluğa və korrupsiyaya qarşı şəxsən özü qəti və prinsipial mübarizəyə başlamış və qısa müddətdə bunun müsbət nəticələri hər bir insanın həyatında özünü göstərmişdi. Azərbaycanda nizam-intizam, qayda-qanun yaradılmışdır.

Heydər Əliyev əsil liderə məxsus olan keyfiyyətlərdən bacarıqla istifadə edərək respublikanın xalq təsərrüfatında qaynar həyatın formalaşması üçün imkan və vasitələri səfərbər etmişdir. Məhsuldar əməyə münasibət kökündən dəyişdirilmiş, xalq təsərrüfatının inkişafında mövcud olan nöqsanlar, mənfi meyllər aradan qaldırılmış, gələcək inkişafla bağlı məqsəd və vəzifələr müəyyənləşdirilmişdir. Bütün bunların nəticəsində sənaye, kənd təsərrüfatı məhsulları istehsalında, tikinti və quruculuq işlərində qısa müddətdə uğurlara imza atılmışdır. Cəmi bir neçə ildə respublikamızda yeni tipli sənaye müəssisələri, istehsal sahələri istifadəyə verilmiş, on minlərlə yeni iş yerləri yaradılmış, sənayenin ixrac potensialı artmış, istehsalın maddi-texniki səviyyəsi yüksəlmişdir. Heydər Əliyevin bilavasitə rəhbərliyi ilə ötən əsrin 70-80-cı illərində respublikamızın həyatının bütün sahə və istiqamətlərində nəhəng işlər görülüb və möhtəşəm nailiyyətlər əldə olunmuşdur.

Statistik rəqəmlər həmin illərdəki sürətli inkişaf dinamikasını dolğunluğu ilə təcəssüm etdirir. O dövrdə Azərbaycanın sosial-iqtisadi sahələrinin inkişafına əvvəlki 50 ildə olduğundan 1,4 dəfə çox vəsait qoyulmuşdur. Belə ki, 250-dən çox zavod, fabrik, istehsal və emal müəssisələri, Bakı dərin özülləri zavodu, Respublika Sarayı, Konsert-İdman kompleksi, “Gülüstan” Sarayı və digər möhtəşəm obyektlər tikilib istifadəyə verilmiş, çox gəlirli sahə olan üzümçülük və şərabçılığın, pambıqçılığın sürətli tərəqqisinə nail olunmuşdur. Bu zaman kəsiyində respublikamızda məhsul istehsalı əvvəlki əlli ildəki bütün həcmə bərabər səviyyəyə çatmışdır.

Həmin dövrdə Azərbaycanda milli gəlir 2,5 dəfə artaraq, adambaşına ictimai məhsul istehsalının artım tempi 2 dəfədən çox olmuşdur. Sənaye məhsullarının istehsalı 2,7 dəfə artmışdır ki, bu da əvvəlki 30 ildə istehsal olunan məhsulun həcmindən iki dəfə çox idi. Meliorasiya və irriqasiya işlərində də çox nəhəng layihələr həyata keçirilmiş, Araz su anbarı, Mil-Muğan hidroqovşağı, Baş Mil kanalı, Abşeron, Naxçıvan və Lənkəranda suvarma sistemləri, onlarca meliorasiya və irriqasiya obyektləri inşa edilmişdir.

İnsanların yaşayış şəraitinin yaxşılaşdırılması ulu öndərimizin daim diqqət mərkəzində olmuşdur. Yeni yaşayış massivlərinin, kənd və qəsəbələrin salınması, mənzil tikintisinin geniş vüsət alması həmin illərin sürətli inkişaf dinamikasını şərtləndirən əsas amillərdəndir. Həmin dövrdə milli gəlirin artımı, yeni nəhəng yaşayış massivlərinin və mikrorayonların salınması, abadlıq-quruculuq və tikinti işlərinin maksimum sürətlə aparılması hesabına 18,5 milyon kvadratmetrlik mənzil sahəsi tikilmişdir ki, bu da 2 milyon 200 min insanın yeni mənzilə köçməsi və ya mənzil şəraitini yaxşılaşdırması demək idi. Başqa sözlə, qısa müddətdə Bakı şəhərinin əvvəlki yaşayış fonduna bərabər bir şəhər salınmışdı.

Ulu öndərimiz Heydər Əliyevin müstəsna şəxsi keyfiyyətləri onun rəhbərlik etdiyi dövrün bütün mərhələlərində özünü bariz şəkildə büruzə vermişdir. Heydər Əliyevin rəhbərliyi ilə respublikamızın dinamik inkişafı üçün kompleks proqramların işlənib hazırlanmasında yorulmaz fəaliyyət, misilsiz təşəbbüskarlıq və tükənməz enerji istər ötən əsrin 70-80-ci illəri, istərsə də 93-cü ildən sonrakı dövrü xarakterizə edən başlıca amillərdir.

Həmin dövrü xarakterizə edən başlıca amillərdən biri də odur ki, Heydər Əliyev özünün dövlət idarəçiliyi strateji proqramında mədəni və mənəvi intibahı iqtisadi uğurlarla paralel olaraq nəzərdə tutmuş və yüksək zirvələrə ucaltmışdır.

Həmin illər bir tərəfdən, nəhəng abadlıq-quruculuq, iqtisadiyyatımızın sürətli inkişafı, digər tərəfdən mədəniyyətimizin, elmimizin, təhsilimizin intibah dövrləri kimi tarixə düşmüşdür.

Ümummilli liderimiz Heydər Əliyevin on illik prezidentliyi dövrü müstəqillik tariximizə qlobal iqtisadi və aqrar islahatlar, abadlıq və quruculuq işlərinin geniş vüsət alması, daxili və xarici siyasətdə qazanılan sanballı nəticələrlə də müşahidə olunmuşdur. MDB məkanında ilk dəfə olaraq Azərbaycanda torpaq islahatı həyata keçirilmiş, ölkənin sənaye və kənd təsərrüfatı məhsulları istehsalında özəl sektorun payı ilbəil artırılmışdır. Artıq 1996-97-ci illərdən başlayaraq ölkəmiz nəinki böhranın fəsadlarını aradan götürməyə, hətta sürətli inkişaf mərhələsinə qədəm qoymağa müvəffəq olmuşdur. Bazar iqtisadiyyatına keçidlə bağlı həmin illərdə çox böyük və mühüm tədbirlər həyata keçirilmiş, sahibkarlığın inkişafına güclü dəstək verilmişdir.

Hər bir xalqın və dövlətin taleyində, xüsusilə də onun çətinlikləri arxada qoyaraq inkişaf mərhələsinə başladığı bir mərhələdə böyük nüfuza malik, qloballaşan dünyadakı proseslərə təsir etmək iqtidarında olan liderə böyük ehtiyac duyulur. Müstəqil dövlət kimi çox gənc olan Azərbaycanın bu sarıdan da bəxti gətirmişdir. Ulu öndərimiz Heydər Əliyevdən sonra onun ideyalarını yaşadan, siyasi kursunu yeni dövrün tələblərinə uyğun yeni keyfiyyətdə uğurla davam etdirən Prezident İlham Əliyevin simasında Azərbaycanın və regionun yeni lideri, müasir ruhlu, praqmatik düşüncəli rəhbəri yetişmişdir. Təsadüfi deyil ki, 2003-cü il prezident seçkilərindən başlanan dövr müasir tariximizə yeni hərtərəfli inkişaf illəri kimi daxil olmuşdur. Müstəqil Azərbaycan dünya ailəsinin ən önəmli və dəyərli üzvlərindən birinə çevrilmişdir.

Müstəqil Azərbaycan yeni minilliyin başlanğıcında ulu öndərimizin layiqli davamçısı Prezident İlham Əliyevin rəhbərliyi ilə uğurlu gələcəyə doğru inamla irəliləyir, bu yolda möhtəşəm nailiyyətlərə imza atır. Bu gün Azərbaycan dünya miqyasında səciyyələndirilərkən ilk növbədə sabitlik, sıçrayışlı inkişaf və demokratikləşmə ön plana çəkilir. Ölkəmiz sabit iqtisadiyyata və mühüm geostrateji mövqeyə malik olan, qlobal enerji təhlükəsizliyinin təminatında getdikcə vacib rol oynayan bir dövlət kimi xarakterizə olunur. Cənubi Qafqazın lideri statusunu daşıyan ölkəmiz mövcud olduğu regionda hadisələrin inkişaf istiqamətini müəyyən edən aparıcı rola malikdir və təsadüfi deyil ki, bölgəyə iqtisadi, siyasi maraq göstərən dünya dövlətləri, beynəlxalq təşkilatlar, ilk növbədə, Azərbaycanın mövqeyini nəzərə alır, onunla hesablaşırlar. Bütün bunlar bir daha ölkədə həyata keçirilən daxili və xarici siyasətin uğurlu olduğunu, onun praqmatizm üzərində qurulduğunu, milli maraqların müdafiəsinə yönəldiyini əyani surətdə təsdiqləyir. Bu illər ərzində Prezident İlham Əliyev Azərbaycanın dünya arenasında nüfuzunu daha da yüksəklərə qaldırmış, xalqının məhəbbətini qazanmışdır.

Son illərin dinamik inkişaf və tərəqqi dövrünün statistikası real həyat həqiqətlərində - sosial problemlərin davamlı həllində, işsizliyin, yoxsulluğun aradan qaldırılmasında, regionların davamlı tərəqqisində, nəhəng infrastruktur və enerji layihələrinin reallaşdırılmasında, cəmiyyətdə işgüzar fəallığın artmasında, mənəvi-psixoloji ovqatın yüksəlməsində özünü əks etdirir.

Bütün bu uğurlar ulu öndərimizin həmişəyaşar müdrik siyasi kursundan qaynaqlanır. Müstəqil Azərbaycanın qurucusu və banisi, dövlətçiliyimizin qarantı olmuş dahi şəxsiyyətin ölkəmiz və xalqımız üçün etdikləri əsrlər keçsə də tarixi dəyərini itirməyəcəkdir. Ulu öndər Heydər Əliyevin siyasi irsi xalqımızın zəngin xəzinəsinə çevrilmişdir.

Ramiz Quliyev

AZƏRTAC-ın müxbiri