Tokio, 27 noyabr, AZƏRTAC

Oktyabrın əvvəllərində keçirilmiş IV Bakı Beynəlxalq Humanitar Forumunun iştirakçısı, Tokioda ingilis dilində nəşr olunan “The Japan Times” qəzetinin prezidenti Takeharu Tsutsumi həmin beynəlxalq tədbir barədə fikirlərini AZƏRTAC-ın Yaponiyadakı xüsusi müxbiri ilə bölüşüb. Müsahibəni təqdim edirik.

- Cənab Tsutsumi, ötən ay Azərbaycan paytaxtında keçirilmiş IV Bakı Beynəlxalq Humanitar Forumunun əhəmiyyətini necə qiymətləndirirsiniz?

- Qeyd etmək istəyirəm ki, Bakıda keçirilən və dünyanın humanitar problemlərinin həlli yollarının müzakirəsinə həsr edilən Humanitar Forum böyük əhəmiyyətə malikdir. Əgər nümayəndələrin sayını, təmsil etdikləri ölkələrin coğrafiyasını və hazırda dünyada baş verən prosesləri nəzərə alsaq bu beynəlxalq tədbirin əhəmiyyəti daha aydın görünər. Mənim ən çox diqqətimi cəlb edən bir məqamı xüsusi qeyd etmək istəyirəm. Dünyanın 60-dan çox ölkəsindən gəlmiş 600-ə yaxın nümayəndənin arasında keçmiş dövlət başçıları, Nobel mükafatı laureatları və digər dünya miqyaslı şəxsiyyətlərin olması Forumun önəmini daha da artırırdı. Zənnimcə bu, IV Bakı Beynəlxalq Humanitar Forumunun səviyyəsinin çox yüksək olduğunu deməyə əsas verir. Məni belə yüksək, dünya miqyaslı liderlərin toplantısına dəvət etdiyinə görə Azərbaycan rəhbərliyinə dərin minnətdarlığımı bildirmək istəyirəm.

Digər tərəfdən, mən Bakı Forumunu Davos İqtisadi Forumu ilə müqayisə etmək istərdim. Davos Forumunda yalnız iqtisadi məsələlər müzakirə edildiyi halda, Bakı Forumunda daha qlobal, bütün dünyanı düşündürən humanitar problemlər müzakirə müstəvisinə çıxarılır. Bu, Bakı Forumunun əhəmiyyətini xüsusilə artırır.

Cəmiyyətin müxtəlif təbəqələrinin nümayəndələrinin, tamamilə fərqli tərcümeyi-hala malik insanların Forumda iştirakı da məndə xoş təəssüratlar doğurdu.

- Siz Forum zamanı AZƏRTAC-ın təşkilatçılığı ilə keçirilən “Mədəniyyətlərarası və sivilizasiyalararası dialoqun həyata keçirilməsi şəraitində XXI əsr jurnalistikasının problemləri” mövzusunda diskussiyalarda iştirak etdiniz və orada çıxışınız da oldu. Bəs bu müzakirələrin əhəmiyyəti barədə nə deyə bilərsiniz?

- Əvvəla bu mövzuda diskussiyaların yüksək səviyyədə təşkilinə və mənim oradakı çıxışımı diqqətlə dinləyərək bu barədə söylədiyi xoş sözlərə görə AZƏRTAC-ın baş direktoru Aslan Aslanova xüsusi minnətdarlığımı bildirmək istəyirəm.

Qeyd edim ki, diskussiyaların mövzusu həqiqətən də çox aktual mövzuya, sosial şəbəkələrin genişləndiyi bir dövrdə rəqəmsal medianın fəaliyyətinə həsr edilmişdi. Tanınmış jurnalist, TASS agentliyinin baş direktorunun birinci müavini Mixail Qusmanın moderatorluğu ilə keçirilən “dəyirmi masa”da sosial media ilə bağlı onun çox maraqlı bir fikrini xatırlatmaq istəyirəm. M.Qusman hazırkı sosial medianı avtomobilin ixtirası ilə müqayisə etdi. Bildirdi ki, avtomobil də təzə ixtira olunanda onun nə nömrəsi, nə də hərəkət qaydaları mövcud deyildi. Daha dəqiq desək bu sahədə müəyyən bir xaos var idi. Müasir sosial medianı da məhz buna bənzətmək olar, burada da hazırda xaos hökm sürür. Mənə elə gəlir ki, biz bu prosesə tam təbii yanaşmalı və onun peşəkar elektron media ilə birgə fəaliyyətinə çalışmalıyıq.

Bundan əlavə, ABŞ-dan olan jurnalist Terri Makkartinin internetin riskli olması barədə fikri də mənim üçün çox maraqlı oldu. O bildirdi ki, internet dünyanın hər yerində informasiyanı əldə etməyə imkan yaratsa da sosial medianın yaydığı məlumatlarda müəyyən risk var. Yəni bu informasiyalar bir istiqamətlədir və müəyyən tərəfin maraqlarına yönəlib. Mən onun bu fikri ilə tamamilə razıyam və düşünürəm ki, həmin məlumatlarla ehtiyatlı davranmaq lazımdır.

Həmin diskussiyalara mən də qatılaraq Yaponiyada elektron KİV-lər, qəzetlər, onların müasir durumu haqda danışdım. Çoxları elə fikirləşir ki, Yaponiya müasir texnologiyaların geniş yayıldığı ölkə olduğuna görə burada əsasən elektron KİV-lər üstünlük təşkil edir. Lakin mən bildirəndə ki, bizdə qəzetlər, yəni kağız üzərindəki mətbuat çox populyardır, bu, çoxlarının təəccübünə səbəb oldu. Mənim çıxışım AZƏRTAC-ın baş direktoruna xoş təsir bağışladığına görə o, məni növbəti ilk imkanda Azərbaycana səfərə dəvət etdi. Bu, mənim üçün çox böyük şərəfdir.

- Bəs Azərbaycan, onun paytaxtı Bakı haqda nə deyə bilərsiniz? Xahiş edirik təəssüratlarınızı bizimlə bölüşəsiniz.

- Çox təəssüf edirəm ki, iş cədvəlim sıx olduğuna görə Forum iştirakçıları üçün nəzərdə tutulan bədii proqramlarda fəal iştirak edə bilmədim. Lakin avtobusla hərəkət edərkən Bakının necə gözəl şəhər olduğunu seyr edə bildim. Bu şəhərin arxitekturasında müasirliyin və milliyin vəhdəti mənə çox xoş təsir bağışladı. Xüsusən Bakının gecə illüminasiyaları çox gözəl idi. Mən qədim Azərbaycan torpağı Naxçıvana da gedə bilmədim. Buna görə çox təəssüflənirəm. Lakin çox istərdim ki, Azərbaycana növbəti səfərimdə mütləq bu şəhərdə olum.

Bir də təəssüf hissi ilə bildirmək istəyirəm ki, hələ də Yaponiyada Azərbaycanı yaxşı tanımayanlar var. Burada insanların Azərbaycan nefti, digər təbii ehtiyatları barədə xəbərləri olsa da, onlar ölkənizin qədim tarixi, zəngin mədəniyyəti barədə kifayət qədər məlumatlı deyillər. Bu barədə məlumatlar da kifayət qədər çox deyil. Lakin Azərbaycanın dinamik inkişafını, perspektivini nəzərə alaraq mən qətiyyətlə deyə bilərəm ki, ölkəniz yaponların diqqətini tezliklə özünə cəlb edəcək və onlar bu gözəl diyarı görmək üçün çalışacaqlar.

Bu istiqamətdə Azərbaycanın Yaponiyadakı səfirliyinin geniş fəaliyyətini qeyd etmək istərdim. Ümid edirəm ki, bizim redaksiya ilə səfirlik arasında yaranmış sıx dostluq münasibətləri iki xalq arasında əlaqələrin daha da yaxınlaşmasına öz töhfələrini verəcək.

Vüqar Ağayev

AZƏRTAC-ın xüsusi müxbiri

Tokio