Hüquq müdafiəçisi: Fransa Azərbaycana qarşı uzunmüddətli sanksiyaların tətbiqini hədəfləyib
Bakı, 24 fevral, AZƏRTAC
Ermənistan tərəfi onsuz da mütəmadi olaraq silahlı insident yaradır və Azərbaycan ərazilərini atəşə tutur. Bu, mütəmadi baş verən prosesdir. Eyni zamanda, üçtərəfli Bəyanatın əsas prinsiplərindən birinə zidd olaraq hələ də Rusiya sülhməramlı kontingentinin məsuliyyət zonasında silahlı dəstələr qalmaqda davam edir, oradan isə Azərbaycanın digər əraziləri intensiv atəşə tutulur. Bu günlərdə ermənilər müxtəlif çaplı silahlardan Azərbaycan postlarını və ərazilərini intensiv şəkildə atəşə tutdular və bu, gözlənilən idi. Avropa İttifaqının bayrağı altında, amma Fransanın təşəbbüsü ilə Aİ nazirlərinin yığıncağında Ermənistan ərazisinə müşahidə missiyasının göndərilməsi ilə bağlı qərar qəbul olunmuşdu. İndi artıq həmin müşahidəçilərin bir hissəsi gəlib və onların içərisində hətta silahı olanlar da var. Bu, birtərəfli mandatdır və Azərbaycan tərəfindən tanınmır.
Bu fikirləri AZƏRTAC-a açıqlamasında hüquq müdafiəçisi Sahib Məmmədov söyləyib.
Onun sözlərinə görə, Azərbaycan bu yarımsilahlı “müşahidə missiyası”nın mandatını tanımır. Regionda hərbi kontingenti, Ermənistanda hərbi bazaları, həmçinin Azərbaycan ərazisində “sülhməramlı” deyilən hərbi qüvvələri olan Rusiya da bunun əleyhinədir. Görünən odur ki, missiyanı yaradanların məqsədlərindən biri də ermənilərin silahlı təxribatlarına Azərbaycan tərəfinin verdiyi adekvat cavabı qeydə alıb Brüsselə ötürməkdir. Azərbaycan həmin legitim hədəfləri susdurmaq məcburiyyətində qalacaq və bu “missiya” birtərəfli olaraq bunu qeydə alacaq. Amma bəllidir ki, onlar ermənilərin təxribatlarını qeydə almayacaqlar. Sonra bunu Brüsselə göndərəcək və oranı inandırmağa çalışacaqlar ki, Azərbaycan Ermənistana qarşı hücumlar təşkil edir, silahli insidentlər yaradır. Bununla Fransa Azərbaycana qarşı uzunmüddətli sanksiyaların tətbiqini hədəfləyib. Burada əsas aparıcı qüvvə göründüyü kimi, Fransadır, əsas məqsəd də elə budur.
“Avropa İttifaqının digər məqsədlərindən biri Rusiyanı regiondan, o cümlədən onların bazalarının Ermənistandan çıxarılmasıdır. İlk dəfədir ki, regiona başqa üçüncü dövlətin silahlı qüvvələri “müşahidəçi” adı altında yerləşdirilir. Rusiya istisna olmaqla, - çünki o, Kollektiv Təhlükəsizlik Müqaviləsi Təşkilatının üzvüdür, onun hərbi bazalarını saxlaması ikitərəfli müqavilələrlə tənzimlənirdi, - başqa regiondan olan kiminsə silahlı dəstələri bölgədə yox idi. Bu, artıq təhlükəli tendensiyanın başlanmasından xəbər verir. Avropa İttifaqı, xüsusilə Fransa, eyni zamanda, Fransanın təsiri altında olan qüvvələr Ermənistanla Azərbaycan arasında sülh müqaviləsinin bağlanmasında maraqlı olmadıqlarını açıq surətdə nümayiş etdirirlər. Həmişə olduğu kimi, bu dəfə də onlar ermənilərdən istifadə edirlər. Ermənistan da bu vəziyyətdən ürəklənir, sanki “atasının yanında cəsarətlənən uşaq” təəssüratı yaradır. Deməli, Avropa İttifaqı nazirlərinin yaratdığı, birtərəfli mandatı olan bu qrup özlüyündə mülki missiyadır. Amma göründüyü kimi, mülki missiyanın yarıbayarısı silahlıdır”, - deyə Sahib Məmmədov diqqətə çatdırıb.
O əlavə edib ki, İran özünün ətrafında mif yaradır. Guya Azərbaycanda İsrailin hansısa qüvvələri, kəşfiyyat qrupları var deyərək özündən miflər uydurur və bunu özünə qlobal təhlükə kimi görür. İran heç vaxt Azərbaycana qarşı səmimi olmayıb. Azərbaycanın müstəqilliyini istəmir və əvvəllər bu strategiyasını yarıgizli saxlasa da, indi artıq düşmən mövqeyini tam açıq şəkildə nümayiş etdirir. Səfirliyimizə qarşı törədilən terror aktından sonra isə bizim İrana qarşı heç cür illüziyamız ola bilməz. Amma İran real təhlükəyə susur. Avropa İttifaqının bu “missiyası” həm də İran üçün ciddi təhlükə mənbəyi olmasına baxmayaraq, o, bunu görmək istəmir.
Bölmənin digər xəbərləri
