İlahiyyat İnstitutu Azərbaycanda din sahəsində təhsil verən yeganə ali məktəbdir
Bakı, 21 iyun, AZƏRTAC
Bu gün bizim üçün əlamətdar bir gündür. Dini Qurumlarla İş üzrə Dövlət Komitəsinin yaranmasının 24 illiyini qeyd edirik. Eyni zamanda, Azərbaycan İlahiyyat İnstitutunun 4-cü “Məzun günü”nü keçiririk.
AZƏRTAC xəbər verir ki, bu sözləri Azərbaycan İlahiyyat İnstitutunun rektoru Aqil Şirinov jurnalistlərə müsahibəsində söyləyib.
Rektor xatırladıb ki, Azərbaycan İlahiyyat İnstitutu Prezident İlham Əliyevin Sərəncamı ilə yaradılıb. Azərbaycanda din sahəsində təhsil verən yeganə ali təhsil müəssisəsidir. Həmçinin institut 4 ildir ki, öz “Məzun Günü”nü keçirir: “Bu məzunlar Azərbaycanda müxtəlif dini ocaqlarda, elmi müəssisələrdə fəaliyyət göstərirlər. Sevindirici haldır ki, institutun məzunları peşəkar dini kadrlar olaraq respublikanın müxtəlif qurumlarında öz fəaliyyətlərini davam etdirirlər. Azərbaycan İlahiyyat İnstitutunun beynəlxalq əlaqələri də çox inkişaf edib. Təqribən 33 xarici ali təhsil müəssisəsi ilə müqavilələrimiz var. Onlarla tələbə və müəllim mübadiləsi həyata keçiririk. İnstitutun beynəlxalq səviyyədə jurnalı var. İnstitut müəllimləri beynəlxalq simpoziumlarda, konfranslarda çıxışlar edir, din sahəsində kitablar nəşr etdirirlər. Əminliklə bildirirəm ki, Azərbaycan İlahiyyat İnstitutu din sahəsində təcrübəli kadrlar hazırlayır və bu sahədə fəaliyyətimizi davam etdirəcəyik”.
Bölmənin digər xəbərləri
