İlahiyyat İnstitutunun müəlliminin məqaləsi Küveytin “əl-Müctəma” jurnalında dərc olunub
Bakı, 1 mart, AZƏRTAC
Azərbaycan İlahiyyat İnstitutunun (Aİİ) dillər və ictimai fənlər kafedrasının müəllimi, fəlsəfə üzrə fəlsəfə doktoru Elvüsal Məmmədovun Xocalı soyqırımının 27-ci ildönümü ilə bağlı hazırladığı məqalə Küveytin “əl-Müctəma” jurnalında dərc olunub.
Aİİ-dən AZƏRTAC-a bildirilib ki, “Azərbaycanlıların məruz qaldığı Xocalı qətliamı: bir gecədə baş vermiş faciə” sərlövhəli məqalədə 1992-ci il fevralın 25-dən 26-na keçən gecə ermənilərin Xocalıya xaincəsinə hücumunu əks etdirən faktlar əksini tapıb. Azərbaycanlıların ermənilər tərəfindən zaman-zaman etnik təmizləmələrə və soyqırımına məruz qaldığı nəzərə çatdırılıb.
Məqalədə ümummilli lider Heydər Əliyevin Xocalı soyqırımı haqqında söylədiyi sözlər əksini tapıb: “Bütövlükdə Azərbaycan xalqına yönəldilmiş Xocalı soyqırımı öz ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktıdır. Bu soyqırımı, eyni zamanda, bütün bəşəriyyətə qarşı tarixi bir cinayətdir”.
Müəllif vurğulayıb ki, Xocalı soyqırımını törədənlər beynəlxalq ədalət qarşısında cavab verməlidirlər.
Bölmənin digər xəbərləri
