“İndyuşkin Dvor” MMC-nin məhsul idxalına qoyulan qadağa aradan qaldırılıb
Bakı, 16 avqust, AZƏRTAC
Qida Təhlükəsizliyi Agentliyi ölkəyə idxal olunan qida məhsullarına nəzarət tədbirlərini davam etdirir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, Rusiyadan idxal olunan “İndyuşkin Dvor” MMC-nin istehsalı olan dondurulmuş hind quşu budu məhsulunda aşkarlanan uyğunsuzluqla bağlı qoyulan müvəqqəti məhdudiyyət aradan qaldırılıb.
Agentliyin Rusiya Federasiyasının Baytarlıq və Fitosanitar Nəzarət üzrə Federal Xidmətinə (“Rosselxoznadzor”) göndərilmiş müvafiq bildirişi əsasında həmin qurum tərəfindən istehsalçı müəssisədə baytarlıq nəzarəti tədbirləri və laborator müayinələr aparılıb. Görülmüş müvafiq sağlamlaşdırma tədbirləri, o cümlədən epizooloji monitorinqlərlə bağlı Qida Təhlükəsizliyi Agentliyinə ətraflı məlumatlar verilib.
Rusiya Federasiyası tərəfindən baytarlıq norma və tələblərinə, o cümlədən qarşılıqlı olaraq iki ölkə arasında idxal-ixrac əməliyyatları ilə bağlı müvafiq tələblərə əməl olunacağına dair zəmanət verilməsini nəzərə alaraq həmin istehsalçının respublikamıza məhsul idxalına qoyulmuş müvəqqəti qadağa aradan qaldırılıb. Agentliyin qərarı ilə əlaqədar “Rosselxoznadzor”a müvafiq bildiriş göndərilib.
Bölmənin digər xəbərləri
