İngan Malem: İndoneziya xalqı münaqişənin beynəlxalq hüquq normaları çərçivəsində həllinə tərəfdardır
Bakı, 8 oktyabr, AZƏRTAC
Oktyabrın 8-də İndoneziyanın Azərbaycandakı müvəqqəti işlər vəkili xanım İngan Malem Milli Məclisdə olub və deputatlarla görüşüb.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, qonağı parlamentin Mədəniyyət komitəsinin sədri, Azərbaycanın Asiya Parlament Assambleyasındakı nümayəndə heyətinin rəhbəri Qənirə Paşayeva salamlayıb və ona ölkəmizdəki fəaliyyətində uğurlar arzulayıb. Azərbaycanın gərgin tarixi prosesdən keçdiyini qonağın diqqətinə çatdıran komitə sədri ona cəbhə xəttindəki son vəziyyətlə bağlı ətraflı məlumat verib.
Qənirə Paşayeva təmsil etdiyi Tovuz rayonunun iyul ayında işğalçı Ermənistanın fasiləsiz hücumlarına məruz qaldığı, yüzlərlə mülki obyekt və fərdi evlərin dağıdıldığı, insan tələfatı və xəsarət alanlar barədə qonağa ətraflı məlumat verib. Qeyd olunub ki, Ermənistanın sentyabrın 27-də yenidən Azərbaycan ərazilərini intensiv şəkildə ağır artilleriya atəşinə məruz qoyması xalqımızın illərdir sülh gözləntiləri ilə yanaşdığı səbir kasasını daşdırdı. Azərbaycan Prezidenti, Ali Baş Komandan artıq hərb yolundan başqa çıxış yolunun olmadığını xalqa bəyan etdi. Bütün cəbhə boyu sürətli əks-hücuma başlanıldı.
Deputat bildirib ki, 30 ildən artıqdır Ermənistan torpaqlarımıza təcavüz edib. Nəticədə bir milyondan artıq soydaşımız öz dədə-baba yurdlarından didərgin düşüb, torpaqlarımızın 20 faizi işğal altındadır. İşğalçı dövlət uzun illərdir Azərbaycan torpaqlarının qeyd-şərtsiz azad edilməsi ilə bağlı nə BMT-nin 4 qətnaməsinə, nə də digər beynəlxalq təşkilatların tələb və tövsiyələrinə məhəl qoymur. Heç vaxt sülh danışıqlarına tərəfdar olduğunu nümayış etdirməyib. İşğal nəticəsində Azərbaycan iqtisadiyyatına, kənd təsərrüfatına külli miqdarda ziyan dəyib. Hazırda Ermənistan cəbhə xəttindən çox kənarda yerləşən Mingəçevir, Gəncə kimi böyük şəhərlərimizi, Ağcabədi, Beyləqan, Bərdə, Xızı və Abşeron rayonlarına intensiv şəkildə raket zərbələri endirir. Bu məqamda dost ölkələrin dəstəyinə də böyük ehtiyacımız var. Çünki Ermənistan bu müddət ərzində müsəlman dünyasına da böyük mənəvi zərərlər vurub. İşğal etdiyi ərazilərdə yüzlərlə mədəni-tarixi abidələrimizi dağıdıb, məscidlərimizi və müqəddəs ziyarətgahlarımızı təhqir edib. Mədəniyyət komitəsinin sədri İndoneziyanın İslam Konfransı Təşkilatının üzvü olan bir müsəlman ölkəsi kimi bu tarixi ədalətsizliyə susqunluqla yanaşmayacağına ümidvar olduğunu bildirib.
Görüşdə iştirak edən deputatlar Aydın Hüseynov və İlham Məmmədov cəbhə xəttində baş verən son hadisələr, Ermənistanın torpaqlarımızda apardığı işğalçılıq siyasəti və ekoloji terror fəaliyyəti barədə danışıblar. Deputatlarımız coğrafi və dini əqidə baxımından yaxınlığımız olan dost İndoneziyanın Azərbaycanın haqq səsinə səs verəcəyinə, ölkəmizin ədalətli mövqeyini dəstəkləyəcəyinə dair istəklərini dilə gətiriblər.
Görüşə görə minnətdarlığını bildirən İngan Malem İndoneziyanın Azərbaycanda baş verənləri yaxından izlədiyini deyib. Xalqlarımız arasındakı mənəvi yaxınlıqdan danışan qonaq Dağlıq Qarabağda baş verən hadisələrdən narahatlığını bildirib. O, mülki əhalinin öldürülməsinin, cəbhə xəttindən kənarda yerləşən infrastrukturun, evlərin dağıdılmasının çox üzücü olduğunu, müharibə qanunları çərçivəsinə sığmadığını deyib. Qonaq diqqətə çatdırıb ki, onun xalqı bu münaqişənin beynəlxalq hüquq normaları çərçivəsində həllinə tərəfdardır. O, görüşdə müzakirə olunanları İndoneziya rəsmilərinə çatdıracağını deyib.
İngan Malem İndoneziya Nümayəndələr Palatası ilə Azərbaycan parlamenti üzvləri arasında görüşlərin və qarşılıqlı səfərlərin intensivləşdirilməsinin münasibətlərimizin gələcək inkişafı baxımından faydalı ola biləcəyini vurğulayıb.
Bölmənin digər xəbərləri
