İnnovasiya və Rəqəmsal İnkişaf Agentliyi “Holberton” Məktəblər Şəbəkəsi ilə əməkdaşlığa başlayır
Bakı, 29 avqust, AZƏRTAC
İnnovasiya və Rəqəmsal İnkişaf Agentliyi (İRİA) “PAŞA Holding” şirkətlər qrupunun sponsorluğu ilə dünyanın nüfuzlu məktəblər şəbəkəsi “Holberton School”la əməkdaşlığa başlayır.
Agentlikdən AZƏRTAC-a bildirilib ki, əməkdaşlığa əsasən, kompüter elmləri və proqram təminatı mühəndisliyi üzrə ixtisaslaşmış “Holberton” Azərbaycanda yeni tədris proqramına start verir.
Qeyd edək ki, “Holberton” Məktəblər Şəbəkəsi Silikon Vadisində yüksək keyfiyyətli texnoloji proqramlarla, innovativ və praktiki metodologiya əsasında informasiya-kommunikasiya texnologiyaları (İKT) sahəsində tədris proqramı verir.
Proqramdan İKT sahəsində təhsil almaq istəyən 18 yaşdan yuxarı hər kəs yararlana biləcək. Tədris qarşılıqlı (peer-to-peer) öyrənmə üsulu ilə həyata keçiriləcək ki, bu yanaşma tələbələrə komanda əsaslı şəraitdə dərs keçməyə və digər tələbələrlə ünsiyyət imkanı ilə təhsil proqramını effektiv mənimsəməyə imkan yaradacaq. Seçim prosesi onlayn formada baş tutacaq. Belə ki, müvafiq veb-saytdan qeydiyyatdan keçərək müraciət edən şəxsə 3 addımdan ibarət tapşırıqlar veriləcək.
Sonuncu mərhələdə namizədlər “Holberton” nümayəndələri tərəfindən müsahibəyə cəlb olunacaq. Bu mərhələlərdə namizədin məntiqi və analitik düşüncə qabiliyyəti ölçüləcək və onlardan kompüter elmləri, proqramlaşdırma bilikləri tələb olunmayacaq. Eyni zamanda seçim prosesi ingilis dilində baş tutacaq ki, burada da namizədin dil biliyinin olması zəruridir.
Bu mərhələləri uğurla keçən 60 nəfər təlimlərdə iştirak hüququ əldə edəcək və tam təqaüdlü təhsil imkanı qazanacaq. Proqram müddətində dərslər əyani formada, hər gün 09:00-dan 18:00-dək davam edəcək.
Tələbələr ilk 9 ayda kompüter elmləri üzrə təməl bacarıqları mənimsədikdən sonra kiçik proqram təminatı mühəndisi kimi işləyə və ya proqramın təqdim etdiyi altı ixtisasdan birinə (maşın öyrənməsi[IV1] [PR2] , artırılmış və virtual reallıq, “Low level and Algorithms”, “Full stack”, “Front-end” və “Back-end” proqramlaşdırma) müraciət edə bilərlər.
Müraciət üçün son qeydiyyat tarixi sentyabrın 28-dir.
Qeyd edək ki, dərslərə 2023-cü ilin oktyabr ayından start veriləcək.
Bölmənin digər xəbərləri
