İranda dövlət televiziyasının 19 jurnalisti koronavirusa yoluxub
Tehran, 23 mart, AZƏRTAC
İran dövlət televiziyasının 19 əməkdaşı koronavirusa yoluxaraq karantinə alınıb.
AZƏRTAC xəbər verir ki, jurnalistlər xəstəxanalardan reportaj hazırlayarkən xəstə adamlarla təmasda olduqlarına görə virusa yoluxublar.
Bu gün Ümumdünya Səhiyyə Təşkilatının (ÜST) 7 növ antibiotik və digər tibbi ləvazimatlardan ibarət yardımı Tehrana çatıb. ÜST-ün Tehran bürosundan verilən məlumatda deyilir ki, təşkilat İrana yardımlarını davam etdirəcək. Yaxın günlərdə təşkilatın virusoloq həkimlərdən ibarət heyəti İrana səfər edərək yerli həkimlərə kömək göstərəcək.
Bu gün Prezident Həsən Ruhaninin rəhbərliyi ilə İranın Nazirlər Şurasının iclası keçirilib. İclasda koronovirusla mübarizə və real vəziyyət müzakirə olunub. Səhiyyə naziri Səid Nemaki bildirib ki, koronavirusa yoluxanları aşkarlamaq üçün ölkə üzrə 40 min xüsusi tibbi mərkəz yaradılıb. Bu mərkəzlərdə 32 milyon insan testdən keçirilib.
İranın Şərqi Azərbaycan əyalətində koronovirusdan qorunmaq məqsədilə spirtli içki qəbul edənlərdən 200 nəfəri həyatını itirib. Təbriz Universitetinin tibb araşdırmalar mərkəzindən bildiriblər ki, fevral ayından bu günə kimi saxta spirtli içkidən 230 nəfər zəhərlənərək mərkəzə müraciət edib. Onlardan yalnız 30 nəfərin həyatını xilas etmək mümkün olub.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
