İstifadəyə yararsız ət məhsulunun dövriyyəsinin qarşısı alınıb
Bakı, 13 iyun, AZƏRTAC
Baş Dövlət Yol Polisi İdarəsinin (BDYPİ) Saray qəsəbəsində yerləşən stasionar postunda xidmət aparan Yol Polisi Xidməti əməkdaşları tərəfindən “Mercedes” markalı avtomobilin saxlanılması zamanı aparılan yoxlama nəticəsində yük yerində təxminən 600 kiloqram toyuq əti aşkarlanıb.
Bu barədə AZƏRTAC-a BDYPİ-dən məlumat verilib.
Araşdırma zamanı məlum olub ki, məhsulun müşayiətedici sənədləri yoxdur, eləcə də qablaşdırma, daşınma və saxlanma qaydaları kobud şəkildə pozulub. Bu isə məhsulun istifadəyə yararlılığına əsaslı şübhə yaradıb.
Aşkarlanmış məhsul Azərbaycan Qida Təhlükəsizliyi Agentliyinə təhvil verilib, faktla bağlı qanunvericiliyə uyğun tədbirlər görülüb.
“BDYPİ vətəndaşların həyat və sağlamlığını təhlükəyə atan halların qarşısının alınması istiqamətində nəzarət tədbirlərini davam etdirir”, - deyə məlumatda bildirilib.
Bölmənin digər xəbərləri
