İsveçdə vətəndaşlığın alınması qaydaları sərtləşdirilir
Stokholm, 22 mart, Nərgiz Cəfərli, AZƏRTAC
İsveç Miqrasiya Agentliyi (Migrationsverket) vətəndaşlığın alınması ilə bağlı müraciətlərə baxılarkən daha sərt nəzarət tətbiq edir. Məqsəd milli təhlükəsizliyə təhlükə yaradan şəxslərə vətəndaşlıq verilməsinin qarşısını almaqdır.
AZƏRTAC xəbər verir ki, yeni qaydalara əsasən, müraciət edənlər şəxsiyyətini təsdiqləmək üçün idarəyə gəlməli, həmçinin keçmişi, o cümlədən iş yeri, doğulduğu ölkə və səyahət tarixçəsi haqqında ətraflı məlumat verməlidirlər.
“Belə tədbirlər zəruridir, çünki vətəndaşlıq son qərardır və geri çağırıla bilməz”, - deyə Miqrasiya Xidmətinin rəsmisi Oskar Ekblad bildirib. Nəzarətin gücləndirilməsi hökumətin bu ilin yanvarından verdiyi tapşırığa cavab idi. Migrationsverket, həmçinin sənədlərin yoxlanılmasını sərtləşdirməyi və şifahi müsahibələrin sayını artırmağı planlaşdırır.
Son illərdə İsveç Təhlükəsizlik Xidməti vətəndaşlıq üçün müraciət edənlərin təhlükə yaratdığını təsdiq edən halları getdikcə daha çox müəyyən edir. Əgər əvvəllər təhlükəsizlik səbəbi ilə hər il təxminən 100-180 müraciət rədd edilirdisə, 2023-cü ildə 756, 2024-cü ildə isə 566 belə hal olub. Eyni zamanda, hətta milli təhlükəsizlik üçün təhlükə yaradan şəxslər də yaşayış icazəsi olduqda, xüsusən onların deportasiyası humanitar səbəblərə görə qeyri-mümkün olduqda, məsələn, edam olunması və ya işgəncə təhlükəsi daşıdıqda, ölkədə qala bilər.
Qeyd edək ki, 2023-cü ildə 65 min 591 nəfər İsveç vətəndaşlığı alıb.
Bölmənin digər xəbərləri
