Keniya QHT-ləri: Qarabağın erməni sakinlərinin reinteqrasiyasının Ermənistan tərəfindən əngəllənməsini pisləyirik
Bakı, 4 avqust, AZƏRTAC
Keniyanın Turkana Bio Aloe Təşkilatının (TUBAE) sədri Eliud Emeri beynəlxalq ictimaiyyətin diqqətini Ermənistan hökumətinin və Qarabağdakı qeyri-qanuni rejimin qalıqlarının öz siyasi məqsədlərinə çatmaq üçün yaratdıqları süni maneələrə cəlb etmək məqsədilə Keniyada fəaliyyət göstərən vətəndaş cəmiyyəti təşkilatları adından bəyanat yayıb.
AZƏRTAC xəbər verir ki, Keniyada fəaliyyət göstərən vətəndaş cəmiyyəti təşkilatlarının bu bəyanatı beynəlxalq ictimaiyyətin diqqətini Ermənistan hökumətinin və qeyri-qanuni rejimin qalıqlarının öz siyasi məqsədlərinə çatmaq üçün yaratdıqları süni maneələrə cəlb etmək məqsədilə yaydıqları bildirilir.
Sənəddə qeyd olunur: “Biz - Keniyada fəaliyyət göstərən vətəndaş cəmiyyəti təşkilatları bu bəyanatla Azərbaycan Respublikasının Qarabağ regionunun erməni sakinlərinin reinteqrasiyasının Ermənistan tərəfindən əngəllənməsini pisləyirik.
Çoxmillətli və müstəqil ölkə olan Azərbaycan öz ərazisindəki ermənilərin və digər etnik azlıqların bərabər hüquqlar çərçivəsində, dinc şəkildə yaşaya və işləyə bilməsi üçün əlverişli mühit yaradır. Azərbaycan Konstitusiyası etnik və dini mənsubiyyətindən asılı olmayaraq, bütün vətəndaşlara bərabər hüquqlar şamil edir. Bu, Ümumdünya İnsan Hüquqları Bəyannaməsi ilə də təsbit olunan fundamental hüquqlar hesab edilir. Azərbaycan öz Konstitusiyasına, qanunvericiliyinə uyğun olaraq, Qarabağ bölgəsində yaşayan erməni sakinlərin hüquq və təhlükəsizliyini də təmin edəcək.
Ermənistanın bir sıra məmurları tibbi evakuasiya üçün işlək olan Laçın yolu haqqında siyasi manipulyasiya və spekulyasiya yaratmağa çalışırlar. Bu iddialar tamamilə əsassızdır və təkzib edilir.
Əvvəla Laçın yolu Azərbaycanın suveren əraziləri daxilində yerləşir. Azərbaycan öz suveren hüququndan istifadə edərək, dövlət sərhədində “Laçın” buraxılış məntəqəsi yaradıb ki, bu da Azərbaycanın Qarabağ bölgəsindəki erməni sakinləri, Beynəlxalq Qızıl Xaç Komitəsi (BQXK) və Azərbaycanda müvəqqəti dislokasiya olunmuş Rusiya sülhməramlıları tərəfindən istifadə edilir. Beynəlxalq Ədalət Məhkəməsi 6 iyul tarixli qərarı ilə Ermənistanın tələbini rədd etməklə Azərbaycanın sərhəddə keçid məntəqəsinin yaradılması ilə bağlı addımının suveren və qanuni qərar olduğunu bir daha təsdiqləyib”.
Bəyanatda, həmçinin vurğulanıb ki, Azərbaycan tərəfinin Azərbaycanın Qarabağ bölgəsinin erməni sakinlərinin ehtiyaclarını qarşılamaq üçün Ağdam-Xankəndi yolundan istifadə etmək təklifi beynəlxalq təşkilatlar tərəfindən yüksək qiymətləndirilib. Beynəlxalq Qızıl Xaç Komitəsi də humanitar yardım üçün çox əlverişli və işlək olan bu yoldan istifadə etməyə hazırdır. Ağdam-Xankəndi yolu hər növ yüklərin daşınması üçün tam işlək vəziyyətdədir. Amma qanunsuz rejimin qalıqları Qarabağda sadə erməniləri girov götürür və bu yoldan istifadə etməkdən imtina edirlər.
“Humanitar böhran” iddiaları, Ermənistanın və qanunsuz rejimin qalıqlarının provokasiyaları yalnız siyasi tamaşadan ibarətdir. Ermənistan Qarabağdakı ermənilərin gündəlik ehtiyaclarının Azərbaycan hökuməti vasitəsilə asanlıqla həllinə mane olmaqla reinteqrasiya prosesini əngəlləyir.
Beynəlxalq ictimaiyyət bilməlidir ki, Azərbaycan blokada yaratmır, əksinə, yardım təklif edir. Lakin qeyri-qanuni rejimin qalıqlarının təxribatları humanitar yardımdan imtina deməkdir.
Bu, həmin Ermənistan tərəfidir ki, 30 ildən artıqdır Naxçıvan Muxtar Respublikasını blokadada saxlayır. Bu blokada Naxçıvanın Azərbaycanın digər hissəsi ilə quru əlaqəsinə mane olur, insanların gediş-gəlişini və malların daşınmasını əngəlləyir.
Ermənistan rəhbərliyi və qanunsuz rejimin qalıqları Qarabağ bölgəsinin erməni sakinlərinə təzyiq göstərir, öz siyasi məqsədlərinə çatmaq və reinteqrasiyaya qəsdən mane olmaq üçün yerli sakinləri girov kimi istismar edirlər. Reinteqrasiya məqsədilə Azərbaycan yerli ermənilərlə fəal şəkildə əlaqə yaradır.
Diqqətə çatdırılıb ki, Azərbaycan Qarabağda su və elektrik təchizatı, nəqliyyat ilə bağlı problemləri həll etmək üçün ixtisaslı şirkətləri cəlb etməklə uğurlu layihələr həyata keçirib. 2020-ci il müharibəsinin ardınca Azərbaycan yerli ermənilərin də istifadə etdiyi, müasir tələblərə cavab verən yeni Laçın yolu tikib istifadəyə verib. Qarabağda yaşayan ermənilərin Azərbaycana reinteqrasiyası, eyni zamanda, onların yaşayış standartlarını da yüksəldəcək.
“Azərbaycanlılar Rusiya sülhməramlılarının müvəqqəti yerləşdirildiyi Azərbaycan ərazilərindən, məsələn, Xocalıdan, Xankəndidən, Şuşanın kəndlərindən 30 il əvvəl qovulublar. Azərbaycanlı keçmiş məcburi köçkünlərin Qarabağa qayıtmaları ermənilərin tez-tez istinad etdiyi 2020-ci il 10 noyabr tarixli üçtərəfli Bəyanatın 7-ci maddəsində açıq şəkildə göstərilib. Azərbaycan öz keçmiş məcburi köçkünlərinin doğma yurd yerlərinə dinc, ləyaqətli və təhlükəsiz şəkildə qayıtmalarını təmin edəcək.
Biz Ermənistan hökumətini təxribatları dayandırmağa çağırırıq. Çünki onlar Qarabağın erməni sakinlərinin Azərbaycana reinteqrasiyasına əngəl olur, regionda sülhə və təhlükəsizliyə nail olmaq üçün süni maneələr yaradırlar.
Biz beynəlxalq təşkilatlara müraciət edirik ki, adekvat reaksiya versinlər və Qarabağ ermənilərinin Azərbaycana reinteqrasiyası prosesini dəstəkləsinlər”, - deyə bəyanatda vurğulanıb.
Bölmənin digər xəbərləri
