Kiyevdə Zəfərimizin ildönümü və “Konstitusiya və Suverenlik İli” çərçivəsində ekoloji aksiya keçirilib VİDEO
Kiyev, 26 noyabr, AZƏRTAC
Kiyevdə Azərbaycan-Ukrayna Dostluq Xiyabanında Zəfərimizin 5 illiyi və “Konstitusiya və Suverenlik İli” çərçivəsində ağacəkmə aksiyası keçirilib.
AZƏRTAC xəbər verir ki, Azərbaycanın Ukraynadakı səfirliyi və SOCAR-ın Ukraynadakı nümayəndəliyinin birgə təşkilatçılığı ilə keçirilən ağacəkmə aksiyasında Kiyev şəhər meriyasının nümayəndələri, səfirliyimizin diplomatları, “SOCAR-Ukraine”in kollektivi, şəhər sakinləri iştirak ediblər.
Ağacəkmə aksiyasından öncə çıxış edən Azərbaycanın Ukraynadakı səfiri Seymur Mərdəliyev bildirib ki, bugünkü aksiya ətraf mühitin qorunması üçün birgə fəaliyyətin nə qədər vacib olduğunu nümayiş etdirir. Yaşıl şəhərlər həyat, sağlamlıq və davamlı inkişafın simvoludur.
SOCAR-ın Ukraynadakı nümayəndəliyinin rəhbəri Elçin Məmmədov isə çıxış edərək Azərbaycan dövlətinin dəstəyi ilə Ukraynada keçirilən ekoloji layihələr barədə məlumat verib.
Layihəyə görə Azərbaycan dövlətinə təşəkkürünü bildirən Kiyev Şəhər Dövlət Administrasiyasının Ətraf Mühitin Mühafizəsi və İqlim Dəyişikliyinə Uyğunlaşma Departamentinin rəhbəri Pavel İvanov qeyd edib ki, xiyabanın salınması iki ölkə arasında dost münasibətlərin bariz nümunəsidir. Azərbaycan dövləti Ukraynada da yaşıl dünya üçün öz töhfəsini verir. Bu gün Azərbaycan dövləti, Azərbaycan səfirliyi və SOCAR tərəfindən çox gözəl aksiya həyata keçirilir. Obolon rayonunda artıq neçənci dəfədir ki, Azərbaycan dövləti tərəfindən ağacəkmə aksiyası keçirilir.
“Ukraynanın çətin günlərinə baxmayaraq, bu gün biz xalqlarımız arasında möhkəm dostluq olduğunu bildirən jest etdik. Nəzərə alın ki, bu gün bizim prioritetlərimizdən biri ətraf mühitin daha da yaxşılaşdırılmasıdır. Buna görə də, bu gün biz gözəl ağaclar və kollar əkdik. Bu park daha da yaşıllaşacaq və kiyevlilər illər sonra burada dincəlməkdən məmnun olacaqlar. Ona görə də biz azərbaycanlı tərəfdaşlarımıza və dostlarımıza bugünkü aksiyada iştirak etdiklərinə görə təşəkkür edirik”, - deyə Pavel İvanov əlavə edib.
“SOCAR Ukraine”in əməkdaşı Yelena Osipçuk bildirib ki, Azərbaycan dövləti Ukraynada ətraf mühitin qorunmasında davamlı layihələrini həyata keçirir. Bu gün də Zəfər bayramı və “Konstitusiya və Suverenlik İli” çərçivəsində ekoloji aksiya həyata keçirildi. Bu aksiya Kiyevin ətraf mühitin qorunmasına daha bir töhfə oldu.
Qeyd edək ki, bu, Kiyevin Dnepr çayının sağ sahilində salınan xiyabanda sayca üçüncü ağacəkmə aksiyasıdır.
AZƏRTAC-ın xüsusi müxbiri
Kiyev
Bölmənin digər xəbərləri
