“Koroğlu” Nəqliyyat Mübadilə Mərkəzində avtobus yanıb
Bakı, 18 yanvar, AZƏRTAC
Yanvarın 18-də 21:10 radələrində “Manella” MMC-nin istismarında olan 163 nömrəli müntəzəm marşrut xətti üzrə 77 JA 185 dövlət qeydiyyatı nişanlı sərnişin avtobusunda yanğın olub.
AZƏRTAC xəbər verir ki, hadisə “Koroğlu” Nəqliyyat Mübadilə Mərkəzinin ərazisində baş verib.
Yanğın nəqliyyat vasitəsinin mühərrik hissəsindəki qısaqapanma nəticəsində əmələ gəlib. Bakı Nəqliyyat Agentliyinin əməkdaşları dərhal yanğınsöndürmə vasitələrindən istifadə etməklə alovun qarşısını alıblar.
Hadisə yerinə FHN-nin Dövlət Yanğından Mühafizə Xidmətinin əməkdaşları cəlb edilib. Qısa vaxtda yanğın tam söndürülüb.
Hadisə nəticəsində hər hansı bir xəsarət alan olmayıb. Yanğın hadisəsi “Koroğlu” Nəqliyyat Mübadilə Mərkəzinin fəaliyyətinə təsir etməyib, müntəzəm marşrut xətləri üzrə avtobusların qrafikə uyğun hərəkəti təmin edilib.
Bölmənin digər xəbərləri
