KRAL BEYNƏLXALQ MÜNASİBƏTLƏR İNSTİTUTUNDA GÖRÜŞ
London, 13 iyul (AZƏRTAC). Xüsusi müxbirimiz xəbər verir ki, iyulun 13-də Londonda Azərbaycan Prezidenti İlham Əliyevin məşhur siyasətçilərin, diplomatların, mətbuat nümayəndələrinin, Avropanın tanınmış publisistləri və ictimai xadimlərinin üzvü olduqları Kral Beynəlxalq Münasibətlər İnstitutunda görüşü olmuşdur.
Prezident İlham Əliyevi binanın önündə Böyük Britaniya və Şimali İrlandiya Birləşmiş Krallığının Cənubi Qafqaz üzrə xüsusu nümayəndəsi ser Brayn Fol qarşıladı.
Ser Brayn Fol görüşü açaraq, Azərbaycan Prezidentini təqdim etdi.
Prezident İlham Əliyev görüşdə “Azərbaycan üçün xarici siyasət çağırışları” (“Foreign policy challenges for Azerbaijan”) mövzusunda çıxış etdi.
İlk dəfə 2004-cü ildə bu institutda görüşünü xatırladan dövlətimizin başçısı dedi ki, ötən beş ildə müstəqil Azərbaycan müxtəlif sahələrdə böyük inkişaf yolu keçmiş, özünün milli maraqlarını təmin etmiş, tərəfdaş ölkələrlə yaxşı münasibətlər yaratmışdır.
Ölkəmizin iqtisadi inkişafından danışan Prezident İlham Əliyev bildirdi ki, son beş ildə iqtisadiyyat 2,6 dəfə artmış, yoxsulluğun səviyyəsi xeyli azalmışdır. İqtisadiyyatın inkişafı sosial problemlərin həllinə imkan yaratmışdır. Azərbaycanın iqtisadi uğurlarını beynəlxalq qurumlar da yüksək qiymətləndirir.
Dövlətimizin başçısı Azərbaycanın təşəbbüsü ilə həyata keçirilən layihələrdən danışaraq bildirdi ki, regional əməkdaşlıq baxımından bunların böyük əhəmiyyəti vardır.
Prezident İlham Əliyev Azərbaycanın xarici siyasətinin milli maraqlara, beynəlxalq hüquqa, qarşılıqlı hörmətə, bir-birinin işinə qarışmamaq prinsiplərinə söykəndiyini vurğuladı. Azərbaycanın Böyük Britaniya ilə də yaxşı əlaqələrinin olduğunu deyən dövlətimizin başçısı bildirdi ki, Böyük Britaniya Azərbaycanın strateji tərəfdaşıdır. Bu ölkə ilə əlaqələrimiz Azərbaycan-Avropa İttifaqı əməkdaşlığı baxımından da əhəmiyyətlidir.
Prezident İlham Əliyev Ermənistanın Azərbaycana qarşı hərbi təcavüzündən bəhs edərək xatırlatdı ki, bu təcavüz nəticəsində Azərbaycan ərazisinin 20 faizi işğal olunmuş, 1 milyondan çox azərbaycanlı qaçqın və məcburi köçkün vəziyyətinə düşmüşdür. Azərbaycan münaqişənin beynəlxalq hüquq normalarına uyğun, ölkəmizin ərazi bütövlüyü çərçivəsində həllinə tərəfdardır. Münaqişənin başqa həlli yolu yoxdur.
Sonda Prezident İlham Əliyev görüş iştirakçılarının suallarına cavab verdi.
X X X
İyulun 13-də Böyük Britaniya Hökuməti adından Azərbaycan Prezidenti İlham Əliyevin şərəfinə şam yeməyi verilmişdir.
X X X
Azərbaycan Respublikasının Prezidenti İlham Əliyevin Böyük Britaniya və Şimali İrlandiya Birləşmiş Krallığına rəsmi səfəri davam edir.
######
 |
 |
Bölmənin digər xəbərləri
