Kür çayında hidroloji monitorinq keçirilmişdir
Bakı, 23 may (AZƏRTAC). Ekologiya və Təbii Sərvətlər Nazirliyi gursululuq dövrü üçün Kür çayı və onun deltasında hidroloji monitorinq keçirmişdir.
Nazirliyin mətbuat xidmətindən AZƏRTAC-a bildirmişlər ki, ötən ilin gursululuq dövründə çayın Bankə məntəqəsində suyun səviyyəsi 4,46 metr, sərfi 920 kubmetr/saniyə, orta sürəti 1,20 metr/saniyə, maksimal sürəti 1,92 metr/saniyə təşkil etmişdir.
Mayın 5-6-da Kür çayının deltasında yenidən ölçmə işləri aparılmışdır. Bankə qəsəbəsində suyun səviyyəsi 3,76, Bala Kürdə 4,19-4,63, Ana Kürdə isə 4,90-6,27 metr olmuşdur.
Yeni açılmış kanalın girişində dərinlik 6,92-7,09, çıxışında 4,63-5,66 metrə çatmış, dənizə doğru təxminən 2 kilometr məsafədə dərinlik 2,00-2,90 metrədək azalmışdır. Kanalda “Azərenerjitikintiquraşdırma” Səhmdar Cəmiyyətinə məxsus ixtisaslaşdırılmış “İnam” lilsoran gəmisi ilə dibdərinləşdirmə işləri aparılır.
Hidroloji monitorinqin nəticələri barədə məlumat müvafiq təşkilatlara təqdim edilmişdir.
Bölmənin digər xəbərləri
