Kür və Araz çaylarında növbəti monitorinq keçirilmişdir
Bakı, 12 yanvar (AZƏRTAC). Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin, onların transsərhəd qollarının çirklənmə səviyyəsini öyrənmək məqsədi ilə yanvarın birinci ongünlüyü üçün növbəti monitorinq keçirmişdir.
ETSN-dən AZƏRTAC-a verilən məlumata görə, Kür çayında suyun sərfi dekabr ayının III ongünlüyünə nisbətən 1 kubmetr/saniyə azalaraq 126 kubmetr/saniyə təşkil etmişdir.
Monitorinq göstərmişdir ki, Kür çayında Gürcüstan və Ermənistan ərazilərindən təmizlənmədən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində biogen maddələrin miqdarı normadan dəfələrlə artıqdır. Suyun tərkibindəki spesifik çirkləndiricilərdən fenol və mis birləşmələri yol verilən qatılıq həddini (YVQH) keçmişdir. Belə ki, Şıxlı-2 məntəqəsində və Ağstafaçay su anbarında fenollar 2, mis birləşmələri 4, Ağstafaçay məntəqəsində fenollar 1, 2, mis birləşmələri 3 dəfə normadan artıqdır.
Ermənistan ilə transsərhəd olan Araz çayında suyun sərfi 81 kubmetr/saniyə təşkil etmişdir. Horadiz və I Şahsevən məntəqəsində fenollar 3, mis birləşmələri 4, Bəhramtəpə məntəqəsində fenollar 2, mis birləşmələri 3 dəfə YVQH-ni keçmişdir.
Suyun oksigen rejimi bütün məntəqələrdə sanitar norma daxilində dəyişmişdir.
Bölmənin digər xəbərləri
