Lars Klinqbayl və Berbel Bas Almaniyanın Sosial Demokrat Partiyasının yeni həmsədrləri seçiliblər
Berlin, 27 iyun, AZƏRTAC
Almaniyada koalisiya hökumətinin ortağı olan Sosial Demokrat Partiyasının (SPD) qurultayında partiyanın rəhbər heyətinə seçkilər keçirilib.
AZƏRTAC yerli mediaya istinadla xəbər verir ki, yeni hökumətdə vitse-kansler və maliyyə naziri vəzifələrini tutan Lars Klinqbayl və əmək naziri xanım Berbel Bas partiyanın həmsədri seçiliblər. Bundestaqın sabiq sədri olan B.Bas partiya rəhbərliyində Saskia Eskeni əvəzləyib. O, səslərin 95 faizini toplayaraq, yüksək dəstək alıb. L.Klinqbayla isə qurultay iştirakçılarının 65 faizi səs verib.
L.Klinqbayl fevralda keçirilmiş parlament seçkilərindən sonra SPD fraksiyasının rəhbərliyini üzərinə götürmüş və Xristian Demokratlar İttifaqının (CDU) lideri Fridrix Merts ilə koalisiya danışıqlarında əsas müzakirə tərəfi olmuşdu. SPD-nin keçmiş həmsədri Saskia Esken isə artıq deputat kimi fəaliyyət göstərəcək. Bu dəyişiklik və Klinqbaylın son aylardakı fəaliyyəti partiya daxilində tənqidlərə səbəb olmuşdu.
SPD rəhbərliyi yeni dövrdə partiyanın ənənəvi sosial siyasətinə qayıdacağını və əsas proqramın yenilənməsinə başlayacağını bəyan edib.
Partiyanın planlaşdırdığı yeni siyasi kursu təmsil edən B.Bas qurultaydakı çıxışında sənaye sahəsində iş yerlərinin qorunmasına çağırıb və gender bərabərliyi məsələlərində israrlı mövqe sərgiləyib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
