MARTIN 28-DƏ TÜRKİYƏDƏ YERLİ İDARƏETMƏ ORQANLARINA SEÇKİLƏR KEÇİRİLƏCƏK
Xəbər verdiyimiz kimi, martın 28-də Türkiyədə yerli idarəetmə orqanlarına seçkilər keçiriləcəkdir. Türkiyənin Ali Seçki Komissiyası 20 siyasi partiyanın, o cümlədən müstəqil namizədlərin adlarını bülletenlərə daxil etmişdir. Ölkənin 43 milyon 500 min 64 seçicisi yerli idarəetmə orqanlarınnın rəhbərlərini seçəcəklər. Martın 28-də türk xalqı 5 il müddətinə şəhər, vilayət, rayon, qəsəbə, kənd və məhəllələrinin rəhbərləri vəzifələrinə 93 min nəfəri seçəcəkdir. Ali Seçki Komissiyası 28 mart seçkilərinin hüquqi qaydalarını və bu tarixdə tətbiq olunan qadağaları da açıqlamışdır. Namizədlərin təbliğat kampaniyası martın 27-də saat 18.00-da başa çatacaqdır. Seçkilər haqqında məlumatlar yalnız martın 28-də saat 18.00-dan etibarən veriləcəkdir. Seçki günü restoran, yəməkxana və mağazalarda spirtli içkilər satılmayacaq, əyləncə məkanları bağlı qalacaqdır. Martın 28-də vəzifələrini icra edən polis qüvvələri mənsublarından başqa heç kimin silah gəzdirməsinə icazə verilməyəcəkdir.
Bölmənin digər xəbərləri
