Mərakeş Krallığında Xocalı soyqırımı ilə bağlı anma mərasimi olmuşdur
Bakı, 25 fevral (AZƏRTAC). Azərbaycanın Mərakeş Krallığındakı səfirliyindən AZƏRTAC-a daxil olmuş məlumatda bildirilir ki, fevralın 24-də İSESCO-nun mənzil qərargahında Xocalı soyqırımının 20-ci ildönümü ilə bağlı anma mərasimi olmuşdur. Azərbaycanın bu ölkədəki səfirliyinin, İSESCO və Mərakeş-Azərbaycan Dostluq Cəmiyyətinin birgə təşkilatçılığı ilə keçirilən tədbirdə Mərakeş Krallığı dövlət və hökumət rəsmiləri, deputatlar, ali məktəblərin rəhbərləri və müəllimləri, İslam Əməkdaşlıq Təşkilatına (İƏT) üzv dövlətlərin, habelə Rabatda akkreditə olunmuş diplomatik korpusun, KİV və yerli ictimaiyyətin nümayəndələri, Mərakeş-Azərbaycan Dostluq Cəmiyyətinin üzvləri iştirak etmişlər. Mərasimin əvvəlində şəhidlərin ruhuna Qurani-Kərimdən ayələr oxunmuş, Xocalı qurbanlarının xatirəsi bir dəqiqəlik sükutla yad olunmuşdur.
Tədbiri giriş sözü ilə İSESCO-nun baş direktoru Əbdüləziz bin Osman əl-Tuveycri açmışdır. Baş direktor tədbir iştirakçılarına minnətdarlığını ifadə etmiş, ötən əsrin əvvəllərindən başlayaraq, azərbaycanlılara qarşı ermənilərin həyata keçirdiyi zorakılıqlardan, qanlı cinayətlərdən bəhs etmişdir. 1992-ci il fevralın 25-dən 26-na keçən gecə Xocalıda törədilmiş qırğını azərbaycanlılara qarşı soyqırımı cinayəti kimi qiymətləndirən baş direktor beynəlxalq aləmdə törədilmiş qanlı cinayətlərlə bağlı müşahidə edilən ikili standartları kəskin tənqid etmişdir. O, Xocalı faciəsinin törədilməsindən 20 il keçməsinə baxmayaraq, bu qanlı cinayəti törədənlərin hələ də cəzalandırılmadığını vurğulamışdır. Dağlıq Qarabağı təkcə Azərbaycanın deyil, islam aləminin ayrılmaz bir hissəsi adlandıran Ə.O.əl-Tuveycri işğal edilmiş Azərbaycan torpaqları ilə bağlı qəbul edilmiş BMT qərarlarına Ermənistan tərəfindən riayət edilmədiyini diqqətə çatdırmış, işğal altında olan Azərbaycan torpaqlarının qeyd-şərtsiz boşaldılmasının zəruriliyini vurğulamışdır. Ə.O.əl-Tuveycri çıxışının sonunda dünya dövlətlərini ədalətin tərəfində olmağa, Azərbaycan Respublikasının ərazi bütövlüyünün beynəlxalq hüquq normaları əsasında təmin edilməsini dəstəkləməyə çağırmışdır.
Ölkəmizin Mərakeş Krallığındakı səfirliyinin müşaviri İ.Əliyev əhatəli və dəyərli çıxışına, Xocalı soyqırımı ilə bağlı ədalətli mövqeyinə görə İSESCO-nun baş direktoru Ə.O.əl-Tuveycriyə təşəkkürünü bildirmişdir.
Ermənistan-Azərbaycan, Dağlıq Qarabağ münaqişəsi, münaqişənin həlli istiqamətində Azərbaycan rəhbərliyinin mövqeyi, Xocalı soyqırımı haqqında ətraflı məlumat verən müşavir İ.Əliyev xalqımızın ümummilli lideri Heydər Əliyevin aşağıdakı fikirlərini sitat gətirmişdir: “Xocalıda misli görünməmiş qəddarlıqla törədilmiş bu insan qırğınının yer kürəsinin hər hansı guşəsində baş verməsinin qarşısını almaq üçün Xocalı soyqırımı həqiqətləri dünya ictimaiyyətinə hərtərəfli çatdırılmalı və humanizm ideyalarına sədaqət nümayiş etdirən bütün insanların bu faciəyə öz qəti, birmənalı mövqelərini bildirmələri üçün ciddi və məqsədyönlü iş aparılmalıdır”.
Beynəlxalq ictimaiyyətin bu vəhşi cinayəti pislədiyini, Pakistan, Meksika kimi ölkələrin parlamentlərinin Xocalı qırğınını soyqırımı cinayəti kimi qəbul etdiyini, İƏT-ə üzv ölkələrin parlament İttifaqının 51 dövlətin iştirakı ilə 2012-ci ilin yanvarında İndoneziyada keçirilmiş 7-ci iclasında Xocalı qırğınının azərbaycanlılara qarşı törədilmiş soyqırımı kimi tanınmasına səsləyən qərar qəbul edildiyini diqqətə çatdıran müşavir İ.Əliyev bu dost mövqelərin Azərbaycan xalqı və hökuməti tərəfindən yüksək qiymətləndirildiyini vurğulamışdır.
Sonra Türkiyənin Mərakeşdəki səfirliyi adından xanım Özğe Bakişkan, Mərakeş-Azərbaycan Dostluq Cəmiyyətinin sədri A.əl-Misbahi, Mərakeş-Ukrayna Dostluq və Əməkdaşlıq Cəmiyyətinin sədri M.Fəqiri, Mərakeş-Azərbaycan Dostluq Cəmiyyətinin baş katibi A.bin Salama, keçmiş SSRİ ali məktəb məzunları cəmiyyətinin sədri M.Lahbus və Krallığın Məhəmmədiyyə şəhər hüquq fakültəsinin beynəlxalq əlaqələr üzrə müəllimi M.Malaman Xocalı şəhidlərinin xatirəsini yad edərək, Azərbaycana qarşı erməni təcavüzünü pisləyən, münaqişənin sülh yolu ilə həllinə çağıran çıxışlar etmişlər.
Çıxışlardan sonra Mərakeş-Azərbaycan Dostluq Cəmiyyəti sədrinin müavini N.Tay-tay Rabat məktəbliləri arasında “Müharibə, terror uşaqların gözü ilə - Xocalı soyqırımı” mövzusunda keçirilmiş müsabiqənin qaliblərini elan etmişdir. Qaliblərə mükafatlar təqdim edilmişdir.
Daha sonra “Erməni terroru” sənədli filmi nümayiş etdirilmişdir.
Xocalı faciəsini əks etdirən fotoşəkillərdən və kitablardan ibarət sərgi, Xocalı soyqırımına dair səfirlik tərəfindən hazırlanmış məlumat xarakterli bukletlər iştirakçılar tərəfindən maraqla qarşılanmışdır.
Tədbirin sonunda Xocalı şəhidlərinin xatirəsinə ehsan verilmişdir. Qeyd edək ki, səfirliyin təşəbbüsü ilə Mərakeşin “əl-Hərəkə”, “əl-İslah”, “Le Matin” qəzetlərində Xocalı soyqırımı ilə bağlı ərəb və fransız dillərində məqalələr dərc edilmişdir.
Bölmənin digər xəbərləri
