İDMAN
“Milla”dan Bakı Marşal Klubuna dəstək
Bakı, 20 may, AZƏRTAC
Azərbaycan Qida və Qablaşdırma Şirkətinin (AQQ) “Milla” brendi Azərbaycanda “Formula-1” Avropa Qran-prisinin təşkilatçısı Bakı Şəhər Halqası Əməliyyat Şirkətinin (BŞH) nəzdində fəaliyyət göstərən Bakı Marşal Klubuna (BMK) dəstək göstərəcəyini bəyan edib.
AZƏRTAC xəbər verir ki, BŞH-nin əməliyyatlar şöbəsinin və BMK-nin rəhbəri Çingiz Mehdiyevin, BŞH-nin kommersiya şöbəsinin direktoru Bülənt Özərdimin və AQQ-nin baş meneceri Filip Raytın iştirakı ilə əməliyyat şirkətinin ofisində keçirilən görüşdə tərəflər qarşılıqlı əməkdaşlığın inkişafına dair razılığa gəliblər.
Tədbirdə çıxış edən BŞH rəsmisi Çingiz Mehdiyev əməkdaşlığa görə “Milla” brendinin rəhbərliyinə təşəkkürünü bildirərək deyib: “Öz məhsulları ilə bu yay Bakıda baş tutacaq möhtəşəm yarışda əhəmiyyətli rol oynayan marşallar komandasına verdiyi dəstəyə görə “Milla” şirkətinə təşəkkürümüzü bildiririk. Ümid edirik ki, bu əməkdaşlıq yarışın yüksək əhval-ruhiyyədə keçməsinə töhfəsini verəcək”.
AQQ-nin baş meneceri Filip Rayt çıxışında bu əməkdaşlıqdan böyük qürur duyduğunu bildirib: “Bu il Bakı möhtəşəm yarışa ev sahibliyi edir. Belə bir əlamətdar məqamda məhsullarımızla yarışın marşallarına dəstək göstərmək fürsətinə sahib olduğumuz üçün olduqca şadıq”.
Azərbaycan Qida və Qablaşdırma Şirkəti 2011-ci ildən etibarən fəaliyyət göstərir. Şirkətin “Milla” brendi istehlakçılara lokal qaydada istehsal olunan yüksək keyfiyyətli süd məhsulları təklif edir.