Milli Musiqi Gününün növbəti ünvanı Azərbaycan Milli Konservatoriyası olub VİDEO
Bakı, 18 sentyabr, AZƏRTAC
18 Sentyabr – Milli Musiqi Gününün növbəti ənənəvi tədbiri Azərbaycan Milli Konservatoriyasında keçirilib.
AZƏRTAC xəbər verir ki, tədbirdə çıxış edən Konservatoriyanın rektoru, Xalq artisti Kamilə Dadaş-zadə 18 sentyabrın Azərbaycan mədəniyyəti və musiqi tarixində xüsusi əhəmiyyət daşıdığını bildirib. O, dahi bəstəkar Üzeyir Hacıbəylinin zəngin yaradıcılıq irsindən, milli musiqimizin inkişafında göstərdiyi müstəsna xidmətlərdən danışıb.
Kamilə Dadaş-zadə qeyd edib ki, Üzeyir Hacıbəyli Azərbaycan professional musiqisinin əsasını qoymaqla yanaşı, milli musiqi məktəbinin formalaşmasında və inkişafında mühüm rol oynayıb. Onun yaradıcılıq irsi bu gün də Azərbaycan musiqi mədəniyyətinin inkişafına öz təsirini göstərir. Rektor dahi bəstəkarın irsinin gənc nəslə çatdırılmasının və milli musiqi ənənələrinin davam etdirilməsinin vacibliyini vurğulayıb.
Xalq artisti, Üzeyir Hacıbəyli adına Bakı Musiqi Akademiyasının rektoru Fərhad Bədəlbəyli çıxışında dahi bəstəkarın Azərbaycan musiqi tarixindəki misilsiz rolundan bəhs edib. O, Üzeyir Hacıbəylinin milli musiqimizin inkişafında yeni mərhələnin əsasını qoyduğunu, yaradıcılığı ilə Azərbaycan musiqisinin dünya miqyasında tanınmasına mühüm töhfələr verdiyini bildirib.
Tədbirdə çıxış edən mədəniyyət naziri Adil Kərimli bildirib ki, musiqi hər birimizin həyatında xüsusi yer tutur. Keçmişdən bu günə qədər musiqi insanların duyğularını, düşüncələrini və milli dəyərlərini ifadə edən mühüm sənət sahəsi olub. Hər birimizin dinlədiyi və sevdiyi musiqi xüsusi məna daşıyır.
Nazir bildirib ki, bu gün açılışı keçiriləcək Türk Dünyası Bəstəkarlarının I Qurultayının qonaqları da tədbirlərdə iştirak edirlər.
O qeyd edib ki, Azərbaycanın ev sahibliyi ilə Türk dünyası çərçivəsində mədəniyyətlə bağlı bir sıra mühüm tədbirlər, müzakirələr və simpoziumlar təşkil olunub. Türk dünyasının ortaq musiqi sənətinin və musiqi irsinin inkişafı, həmçinin mütəxəssislər arasında fikir və təcrübə mübadiləsinin genişləndirilməsi baxımından bu tədbirlərin Bakıda keçirilməsi mühüm əhəmiyyət daşıyır.
Adil Kərimli ümidvar olduğunu bildirib ki, qurultay Türk dünyasının ortaq musiqi irsinin daha dərindən öyrənilməsinə, əlaqələrin genişlənməsinə və gələcək əməkdaşlığın möhkəmlənməsinə töhfə verəcək.
Türk Mədəniyyəti və İrsi Fondunun prezidenti Aktotı Raimkulova deyib ki, Üzeyir Hacıbəylinin yaradıcılığı milli musiqi ənənələri ilə müasir bəstəkarlıq məktəbinin vəhdətinin parlaq nümunəsidir.
Türk Dünyası Bəstəkarlarının I Qurultayının belə əlamətdar gündə keçirilməsinin xüsusi məna daşıdığını bildirən A.Raimkulova qurultayın Türk dünyasının bəstəkarları arasında yaradıcılıq əlaqələrinin genişlənməsinə və ortaq musiqi irsinin daha yaxından tanıdılmasına töhfə verəcəyini vurğulayıb.
Sonra Konservatoriyanın tələbələri musiqi proqramı ilə çıxış ediblər.
Bölmənin digər xəbərləri
