Mingəçevirdə elmi-praktiki konfrans keçirilib
Bakı, 10 iyul, AZƏRTAC
Mingəçevir Dövlət Universitetində (MDU) “Qərbi Azərbaycan irsinin tanıdılmasında Ümummilli Lider Heydər Əliyevin rolu” mövzusunda elmi-praktiki konfrans keçirilib. Tədbir Bakı Politoloqlar Klubunun təşkilatçılığı və Qeyri-Hökumət Təşkilatlarına Dövlət Dəstəyi Agentliyinin dəstəyi ilə baş tutub. “Qərbi Azərbaycanlıların Qayıdış Konsepsiyasının” icrasına ictimai dəstək məqsədi daşıyan layihə çərçivəsində respublikanın bir neçə şəhər və rayonunda silsiləvi tədbirlərin keçirilməsi nəzərdə tutulub.
Universitetdən AZƏRTAC-a bildirilib ki, MDU-nun professor-müəllim və tələbə heyətinin, Mingəçevir şəhər ictimaiyyət nümayəndələrinin qatıldığı tədbiri rektor Şahin Bayramov açıb. Qonaqları və iştirakçıları salamlayan Ş.Bayramov mövzunun aktuallığından bəhs edib, sözügedən istiqamətdə maarifləndirici tədbirlərin keçirilməsinin, eləcə də tarixi həqiqətlərin öyrənilməsi və təbliği sahəsində atılan addımların vacibliyindən söz açıb.
Bakı Politoloqlar Klubunun sədri, Qərbi Azərbaycan İcmasının üzvü Zaur Məmmədov “Qərbi Azərbaycan irsinin tanıdılmasında Ümummilli Lider Heydər Əliyevin rolu” layihəsinin məqsədləri haqqında auditoriyanı məlumatlandırıb, “Qayıdış Konsepsiyası daxili və xarici siyasətimizin istiqamətlərindən biri kimi” mövzusunda çıxış edib. O, çıxışında Prezident İlham Əliyevin tarixi Azərbaycan torpaqlarına qayıdışla bağlı, həmçinin dövlətimizin gələcək təhlükəsizliyi və inkişafı ilə əlaqədar apardığı xarici və daxili siyasətin önəmindən danışıb.
Milli Məclisin deputatı Aydın Mirzəzadə “Qərbi Azərbaycan tarixi irsinin qorunmasında Heydər Əliyev siyasəti” mövzusunda çıxış edib.
Prezident kitabxanasının şöbə müdiri, tarix üzrə fəlsəfə doktoru, Qərbi Azərbaycan İcmasının İdarə Heyətinin üzvü Nazim Mustafayev “Qərbi Azərbaycanın son 200 illik tarixi xronikası. Ulu Öndər Heydər Əliyevin Qərbi Azərbaycanla bağlı çağırışlarının müasir proseslərdə təzahürü” mövzusunda çıxış edib. Tarixçi geniş təqdimatında İrəvan şəhərində, Zəngəzurda və Göyçədə ermənilər tərəfindən məqsədyönlü şəkildə dağıdılmış tarixi-mədəni abidələrimizi, Ermənistan tərəfindən aparılan etnik təmizləmə siyasəti ilə bağlı tarixi faktları nümayiş etdirib. N.Mustafayev çıxışında Ulu Öndər Heydər Əliyevin Qərbi Azərbaycanla bağlı fərman və qərarları, çıxışlarını ardıcıl şəkildə auditoriyanın diqqətinə çatdırıb.
MDU-nun kafedra müdiri Esmira Cəfərova “Qərbi Azərbaycan milli siyasətimizin ən mühüm hədəfi” mövzusunda məruzə edib, yeni dövrün reallıqları və ölkəmiz qarşısında dayanan yeni məqsədlər haqqında ətraflı məlumat verib.
Məruzələr konfrans iştirakçılarının böyük marağına səbəb olub.
Qeyd edək ki, “Qərbi Azərbaycan irsinin tanıdılmasında Ümummilli Lider Heydər Əliyevin rolu” mövzusunda keçiriləcək silsiləvi elmi-praktik konfransların yekun materiallarının toplu şəklində çap edilməsi nəzərdə tutulub.
Bölmənin digər xəbərləri
