Minskdə Azərbaycan-Belarus iqtisadi əməkdaşlığı üzrə hökumətlərarası komissiyanın növbəti iclası keçiriləcək
Bakı, 17 dekabr, AZƏRTAC
Belarusun Azərbaycandakı səfiri Nikolay Patskeviç dekabrın 17-də Bakıda mətbuat konfransında deyib: “Gələn ilin birinci rübündə Minskdə Azərbaycan-Belarus iqtisadi əməkdaşlığı üzrə hökumətlərarası komissiyanın növbəti iclası keçiriləcək”.
AZƏRTAC xəbər verir ki, Minskdə keçiriləcək danışıqlarda Azərbaycan nümayəndə heyətinə Baş nazirin birinci müavini Yaqub Eyyubov, Belarus nümayəndə heyətinə isə Belarusun Baş nazirinin birinci müavini Vladimir Semaşko başçılıq edəcək.
Gözlənildiyinə görə, birgə hökumətlərarası komissiyanın doqquzuncu iclasında tərəflər Belarus ilə Azərbaycan arasında ticari-iqtisadi əlaqələrin inkişafı perspektivlərini müzakirə edəcəklər.
İki ölkə arasında qarşılıqlı əlaqələr yüksək səviyyədədir. İndiyə qədər Belarus ilə Azərbaycan arasında siyasət, iqtisadiyyat, vətəndaşların hüquq və mənafelərinin müdafiəsi, səhiyyə sahələrində, habelə humanitar və elmi-texniki sahələrdə əməkdaşlığa dair 80-dən çox müqavilə imzalanıb. Belarusun və Azərbaycanın demək olar ki bütün müvafiq nazirlik və idarələri arasında qarşılıqlı əməkdaşlıq haqqında sazişlər bağlanıb. Regionlararası əlaqələr genişlənir, müvafiq sənədlər qəbul edilir.
Bölmənin digər xəbərləri
