Qərbin Moldovadakı referenduma münasibəti demokratik dəyərlərin selektiv şəkildə tətbiqi təəssüratı yaradır ŞƏRH
Bakı, 23 oktyabr, AZƏRTAC
Moldovadakı son referendum və onun nəticələri Qərb ilə keçmiş sovet ölkələri arasındakı münasibətlərdə və Avropa İttifaqına (Aİ) inteqrasiyada mühüm əhəmiyyət kəsb edir. Referendumun nəticələrinə görə, əhalinin yarısı Avropa İttifaqı üzvlüyünə "yox" deyib. Bu isə Moldovanın gələcəkdə xarici siyasət kursunu təyin etmək baxımından ciddi suallar doğurur. Bu nəticə həm də Moldovanın qərbyönümlü siyasətinə dəstəyin o qədər də güclü olmadığının göstəricisidir. Nəticələr əhalinin əhəmiyyətli bir hissəsinin Aİ-yə inteqrasiyanın ölkənin problemlərinə həll yolu ola biləcəyinə inamının zəifliyini və ya fərqli bir xarici siyasət istiqamətinə üstünlük verdiyini göstərir. Bu fikir ayrılığı ölkədəki siyasi mühitdə mövcud olan dərin bölünməni və qərbyönümlü inteqrasiya prosesinin cəmiyyətin tam dəstəyini qazana bilmədiyini əks etdirir.
Bunu AZƏRTAC-a məxsusi açıqlamasında Milli Məclisin deputatı Vüqar İskəndərov deyib.
Onun sözlərinə görə, Moldovanın son illərdəki siyasi gərginlikləri, iqtisadi vəziyyəti və Rusiyanın bölgədəki təsiri bu nəticələri şərtləndirən əsas amillərdən olub. Əhalinin iqtisadi vəziyyətin yaxşılaşdırılmasına və korrupsiyanın aradan qaldırılmasına dair gözləntisi böyükdür. Lakin Avropa İttifaqı ilə inteqrasiyanın bu məsələlərin həllində real dəyişikliklər yaradıb-yaratmayacağı barədə ciddi şübhələr qalmaqdadır. Bundan əlavə, Rusiyanın regionda güclü nüfuzu və Moldova cəmiyyətində dərin kök salmış ortodoksial dini və mədəni dəyərlər Aİ-yə inteqrasiyaya qarşı çıxan qüvvələrin mövqeyini gücləndirir.
Referendumun nəticələrinin Qərb tərəfindən "dezinformasiya kampaniyasının nəticəsi" kimi təqdim edilməsindən danışan Vüqar İskəndərov əlavə edib: “Qərbin demokratik seçki və xalqın iradəsinə yanaşmasının bu formada olması bəzi narahatlıqlar yaradır. Moldovadakı referendumun nəticələrini qəbul etmək əvəzinə, onları dezinformasiya və xarici təsir nəticəsi kimi görmək, ölkədəki real ictimai fikrin gözardı edilməsinə səbəb ola bilər. Bu yanaşma Gürcüstanda da müşahidə olunub, orada da Qərb ölkələrinin bu cür nəticələrə münasibəti oxşar olub və xalqın iradəsi müəyyən mənada nəzərə alınmayıb”.
Deputatın sözlərinə görə, Qərbin demokratik dəyərləri dəstəkləyən siyasəti fonunda belə yanaşma, bu dəyərlərin seçmə şəkildə tətbiq olunması təəssüratı yaradır. Qərb ölkələri demokratik seçki proseslərini və xalqın iradəsini yüksək dəyərləndirdiklərini tez-tez vurğulasalar da, onlar bu nəticələri öz maraqlarına uyğun gəlmədikdə başqa cür şərh edirlər. Bu, region ölkələrində Qərbə qarşı etimadsızlığı artırır və onları alternativ yollar axtarmağa sövq edir.
“Nəticədə Moldovanın Avropa İttifaqına üzvlüyə münasibəti əhalinin bölünmüş mövqeyini və ölkədəki siyasi ikiləşməni nümayiş etdirir. Qərbin bu nəticələrə reaksiyası isə onun demokratiya prinsiplərinə yanaşmasını təkrar gözdən keçirmək üçün bir fürsət ola bilər. Moldovada referendumun nəticələrini nəzərə almamaq və onları "dezinformasiya" kimi təqdim etmək ölkənin gələcək xarici siyasət kursuna və xalqın inamına təsir edə bilər. Bu vəziyyət xüsusilə sosial və iqtisadi problemlər fonunda ölkədə siyasi gərginliyin və ictimai narazılığın artmasına səbəb ola bilər.
Qısacası, Moldovadakı son referendum və Qərbin bu nəticələrə yanaşması yalnız ölkənin xarici siyasətinə deyil, həm də regionun demokratik proseslərinin inkişafına və Qərb dəyərlərinin tətbiqinə dair geniş müzakirələrə səbəb olub. Bu proseslər isə gələcəkdə Moldovanın və regionun digər ölkələrinin Avropa ilə münasibətlərini müəyyən edən əsas amillər arasında olacaq”, - deyə Vüqar İskəndərov vurğulayıb.
Bölmənin digər xəbərləri
