Myanma hökuməti zəlzələnin nəticələrinin aradan qaldırılması üçün 240 milyon dollar ayıracaq
Bakı, 2 aprel, AZƏRTAC
Myanma hökuməti zəlzələnin nəticələrinin aradan qaldırılması və bərpa işləri üçün 240 milyon dollar ayıracaq.
AZƏRTAC xəbər verir ki, bu barədə Dövlət İdarə Şurasının sədri məlumat verib. Bildirilib ki, təbii fəlakətdən sonra 16 ölkə və bölgədən olan xilasetmə qrupları, tibbi briqadalar humanitar yardım və tibbi ləvazimatlarla Myanmaya gəliblər.
Xatırladaq ki, martın 28-də Myanmada 7,7 bal gücündə zəlzələ olub. Zəlzələdən sonra 2,8-7,5 aralığında 12 afterşok qeydə alınıb. Yeraltı təkan paytaxt Naypyida şəhəri və Mandalay regionunda xeyli dağıntıya səbəb olub. Bəzi yaşayış məntəqələrində elektrik təchizatı və mobil rabitə sistemi pozulub. Paytaxt ilə ölkənin ən böyük şəhərini birləşdirən magistral yola, xüsusən də körpülərə və yol ötürücülərinə ziyan dəyib. Nəticədə yolun müəyyən hissəsindən istifadə etmək mümkün deyil.
Bölmənin digər xəbərləri
