Naxçıvan, 24 may, AZƏRTAC

Naxçıvan şəhərində yerləşən “Naxçıvanqala” Tarix-Memarlıq Muzey Kompleksində göycə məhsullarının satışı yarmarkası keçirilib. Yarmarkada göycə və göycə məhsulları ilə yanaşı, müxtəlif çeşiddə əl işləri də alıcıların ixtiyarına verilib.

AZƏRTAC-ın Naxçıvan bürosunun əməkdaşları yarmarkada olub, iştirakçıların təəssüratlarını öyrəniblər.

Şərur rayonunun Danyeri kəndindən olan təsərrüfatçı Yaqub Həsənov yarmarkanı təşkil edənlərə minnətdarlığını bildirərək deyib: “Əvvəllər satışlarımız asan olmurdu. Festival və yarmarkaların keçirilməsi bizim satışlarımıza da müsbət təsir göstərdi. İndi yerli alıcılarla yanaşı, başqa yerlərdən gələn qonaqlar da göycə məhsullarına maraq göstərirlər. Təbii məhsullarımız əl-əl axtarılır. Çünki biz becərdiyimiz ağaclara kimyəvi deyil, təbii gübrələr veririk. Ona görə də Naxçıvan meyvələri həm dadlı, həm də insan sağlamlığı üçün faydalı olur. Məsələn, mən yarmarkaya 400 kiloqram göycə gətirmişdim. Çox qısa zamanda, bir neçə saata satıldı”.

Cəlilkənd kəndindən olan ailə təsərrüfatının gənc nümayəndəsi Vüsal Qasımzadə isə yarmarkaya daha çox göycədən hazırlanan məhsullar ilə qatıldıqlarını bildirdi. O, konservləşdirilmiş göycə mürəbbəsi, kompotu və turşusunun anası tərəfindən hazırlandığını və satışın yaxşı olduğunu qeyd etdi. Bildirdi ki, satışların təşkili üçün festival və yarmarkalar xüsusi rola malikdir. Burada satışların həyata keçirilməsi daha rahatdır. Çünki alıcıların böyük əksəriyyəti məhz belə yarmarkalara üz tutur. Digər vaxtlarda isə hazırlanan məhsullar mağazalara verilir, bəzən evdən də satılır.

Yarmarka iştirakçıların biri də Oğuz kəndindən olan Firudin Əliyevdir. Uzun illərdir bağçılıqla məşğul olduğunu deyən fermer bildirib ki, xaricdən gətirilən hibrid meyvə sortlarının məhsulları yerli növlər kimi dadlı olmur. Ona görə də muxtar respublikaya qonaq gələn hər kəs dad-tamı ilə seçilən təbii Naxçıvan məhsullarını almağa çalışır. Yarmarkada biz bunun bir daha şahidi olduq. Ailə təsərrüfatçılarına yaratdığı şəraitə görə dövlətimizə minnətdarıq.

Satılan məhsulların çeşidləri ilə maraqlanan alıcı Zəminə Abbaszadə bizimlə söhbətində bildirdi ki, yarmarkada iştirak etmək onda gözəl əhval-ruhiyyə yaradıb: “Bakıdan qonaq gəlmişəm. Sözün açığı Göycə yarmarkasının keçirilməsinə çox sevinirəm. Torpağımızın məhsulu çox dadlıdır. Naxçıvanda yetişən meyvə-tərəvəz ləzzəti ilə seçilir. Ona görə Naxçıvanın məhsullarını daha çox sevirəm. Yarmarkada müxtəlif çeşiddə məhsullar var, hamısı da bir-birindən keyfiyyətlidir".

Kəngərli rayonunun Şahtaxtı kəndindən olan təsərrüfatçı Qabil Hüseynov yarmarkada qiymətlərin münasib olduğunu deyib: “Alan da, satan da razı qalır. Dövlətimizə minnətdarıq ki, belə yarmarkalar keçirir. Mənim kimi təsərrüfatçılar öz məhsullarını rahat sata bilirlər”. Müsahibimiz vurğuladı ki, dövlət ailə təsərrüfatları üçün gözəl şərait yaradıb. Bu amil kəndlini daha yaxşı məhsul yetişdirməyə həvəsləndirir.

Övladları və nəvələri ilə çay süfrəsi ətrafında əyləşən Naxçıvan şəhər sakini Almaz Rüstəmova qeyd etdi ki, yarmarka çox yaxşı təşkil olunub. Göycə məhsulları ilə yanaşı, əl işləri də satışa çıxarılıb: “Bizim üçün də bir fürsət oldu. Gəzdik, lazım olanı aldıq. Qiymətlər bazarda olanla xeyli fərqli, münasib idi. Ailəmlə birlikdə çox gözəl istirahət etmiş olduq. Bütün təşkilatçılara minnətdaram”.

Sədərək rayonu Sədərək kəndinin sakini, qadın təsərrüfatçı, Əməkdar kənd təsərrüfatı işçisi Mehparə Hüseynova bizimlə söhbətində vurğuladı ki, ailə təsərrüfatı ilə beş ildir məşğul olur. “Ətrafıma topladığım 12 evdar xanımla birlikdə işləyirik. Birlikdə əkirik, məhsullarımızı bir yerdə hazırlayırıq. Bir ildə əldə etdiyimiz gəlirlə bir ailəyə inək, o birinə toyuq-cücə və sair almışıq. Bu şəkildə bir-iki il qazanc götürmədən özümüz üçün təsərrüfat qurduq. Hazırda işlərimiz yaxşıdır. Ötənilki festivala 157 adda 5 min ədəd məhsul çıxarmışdım. Bu dəfə də yarmarkaya xeyli məhsul gətirdik. Qovurma, çay bitkiləri, çiy yarma, doşab, sarı çiçək mürəbbəsi, ümumiyyətlə, çox fərqli çeşidlərdə məhsullar hazırlayırıq. Festivala, yarmakaya gələndən sonra işlərimizin necə maraqla qarşılandığını gördüm. Satış üçün əziyyət çəkmirik, çox rahat şəkildə məhsulumuzu müştəriyə çatdıra bilirik”, - deyə o bildirib.

Hazırda bütün mağazalarda məhsulları olduğunu deyən təsərrüfatçı sifarişlə Bakıya, Türkiyəyə də məhsul satdıqlarını deyib: “Keçən il Çindən rəngli bibərlərdən mürəbbə sifarişi almışdıq, hazırlayıb göndərdik. Satışlarımız yaxşıdır. Bütün bunlar dövlətimizin bizə yaratdığı şərait nəticəsində mümkün olur. Buna görə muxtar respublika rəhbərinə qadın təsərrüfatçıları adından minnətdaram”.

Yarmarkaya həyat yoldaşı ilə birlikdə qatılan Ordubad rayonunun Yuxarı Əndəmiç kəndindən olan Banuçiçək İsmayılova isə bildirib ki, təsərrüfat festivalları başlayandan gündən belə tədbirlərə həvəslə qatılırlar: “Festivallar bizim işimizə çox kömək edir. Əvvəllər istehsal etdiyimiz malları bazara çıxarmaqda çətinlik çəkirdik. Amma festival və yarmarkaların təşkil olunması bizi bu çətinliklərdən xilas etdi. Artıq hazırladığımız məhsulları rahat şəkildə satıb qazanc əldə edə bilirik”.

Göz oxşayan məhsullarla bəzədilmiş stendə yaxınlaşırıq. Naxçıvan Muxtar Respublikası Əmək və Əhalinin Sosial Müdafiəsi Nazirliyinin əməkdaşı Mahir Mustafayev bildirdi ki, nazirlik tərəfindən yarmarkaya 60-a yaxın müəllifin 600-dək əl işi çıxarılıb. Həmin əl işləri, əsasən, sağlamlıq imkanları məhdud qadınlara və uşaqlara aiddir. Məqsəd onların məşğulluğunun və maddi rifahının təmin olunmasıdır. Müəlliflər tərəfindən münasib qiymətlər təyin olunub. Məhsullar alıcılar tərəfindən çox bəyənilir.

Yarmarkada diqqətimizi çəkən məqamlardan biri də məhkumların əl işlərinin satış-sərgisinin təşkil olunması idi. Satış təmsilçisi Coşqun Ələkbərov qeyd etdi ki, şəhərdə məhkumların əl işlərini satan mağaza da fəaliyyət göstərir: “Satışdan əldə olunan gəlirlər məhkumların maddi vəziyyətlərinin yaxşılaşdırılması üçün nəzərdə tutulur. Vətəndaşların marağı çoxdur, satışlar da yaxşıdır. Məhsullarımız əsasən daş duzdan hazırlanır. Cəzaçəkmə müəssisəsində dövlət tərəfindən ildə bir neçə dəfə kurslar təşkil olunur. Məhkumlar cəlb olunur və bitirdikdən sonra sertifikat əldə edirlər. Həmin sertifikatlar cəzalarını bitirib gedən məhkumlara gələcəkdə iş tapması üçün də kömək olur”.

Qeyd edək ki, iki gün davam edən yarmarkaya 195 ailə təsərrüfatı tərəfindən 20 ton 300 kiloqramdan çox göycə məhsulu çıxarılıb. Yarmarka çərçivəsində 95 müəllifin 2 mindən çox rəsm və əl işinin satış-sərgisi də təşkil edilib.