Nazir: Azərbaycan tərəfi həmişə istənilən formatda görüşlərin keçirilməsini dəstəkləyib
Bakı, 15 dekabr, AZƏRTAC
Son iki il ərzində Ermənistanla müxtəlif formatlarda çoxsaylı görüşlər keçirilib. Həmin görüşlərin bir neçəsi liderlər səviyyəsində olub. Bunlar üçtərəfli formatda Rusiya Prezidenti Vladimir Putinin və ya Avropa İttifaqı Şurasının Prezidenti Şarl Mişelin iştirakı ilə keçirilib. Buna görə, bu formatda və ya digər formatlarda görüşlərin keçirilməsini istisna etmək olmaz. Azərbaycan tərəfi hər zaman istənilən formatda görüşlərin keçirilməsini dəstəkləyib.
AZƏRTAC xəbər verir ki, bunu jurnalistlərə açıqlamasında xarici işlər naziri Ceyhun Bayramov söyləyib.
"Biz görüşdə böyük nailiyyət əldə olunmasa belə, görüşün keçirilməsini, orada bəzi hallarda açıq mövzuların danışılmasını müsbət hal kimi qəbul edirik. Təbii ki, qarşı tərəfin buna eyni məsuliyyətlə yanaşması, götürülən öhdəliklərlə bağlı vədlərini yerinə yetirməsi və bu görüşlərin nəticəyönümlü davam etməsi yaxşı olardı. Hesab edirəm ki, qarşı tərəfdən rasional və xoşniyyətli yanaşma olsa, təbii ki, iki il ərzində əldə etdiyimiz proqres daha əhəmiyyətli ola bilərdi", - deyə nazir qeyd edib.
Bölmənin digər xəbərləri
