Nazir müavini: Gənclərin inkişafında bilik və vətənpərvərlik ölkəmizdə əsas hədəf kimi müəyyənləşdirilib
Bakı, 26 sentyabr, AZƏRTAC
Bu günün xüsusi məna daşıması həm tarixi hadisələrlə bağlıdır, həm də gənclərin üzərinə düşən məsuliyyətin daha dərindən dərk olunmasına xidmət edir.
AZƏRTAC xəbər verir ki, bu sözləri gənclər və idman nazirinin müavini İndira Hacıyeva Milli Gimnastika Arenasında yeniyetmə və gənclər arasında VIII Respublika Robot Olimpiadasının açılış mərasimində deyib.
O qeyd edib ki, Vətən müharibəsi şəhidlərinin xatirəsi daim anılır və gənc nəslin qarşısında iki mühüm vəzifə dayanır: bilikli, savadlı, bacarıqlı gənclərin yetişdirilməsi və yüksək vətənpərvərlik ruhunda formalaşmaları.
Nazir müavininin sözlərinə görə, Vətənə xidmət yalnız silahla müdafiə ilə məhdudlaşmır, həm də sağlam həyat tərzi, qadın və gənclərin sağlamlığının qorunması, ölkənin tərəqqisinə xidmət etməklə ifadə olunur.
“Müasir dövrdə gənclərin yüksək texnologiyalar, elmi biliklər və təhlükəsizlik sahəsində kompetensiyalar əldə etməsi xüsusi əhəmiyyət kəsb edir. Bu istiqamətdə 2017-ci ildən etibarən ölkənin bütün bölgələrində həyata keçirilən layihələr nəticəsində robot texnikası sahəsində uğurlar qazanılıb və minlərlə gənc bu prosesə cəlb olunub”, - deyə İndira Hacıyeva əlavə edib.
İndira Hacıyeva, həmçinin beynəlxalq əməkdaşlıq çərçivəsində həyata keçirilən təşəbbüslərin əhəmiyyətini vurğulayaraq, bu işdə dəstək göstərən tərəfdaş qurumlara təşəkkür ifadə edib.
Bölmənin digər xəbərləri
