“NBC News”: Donald Tramp İrana hava hücumu variantını dar çərçivədə müzakirə edir
Bakı, 20 iyun, AZƏRTAC
“NBC News” telekanalı Birləşmiş Ştatların iki müdafiə rəsmisinə və yüksəksəviyyəli administrasiya mənbəsinə istinadla xəbər verir ki, ABŞ Prezidenti Donald Tramp İranın nüvə obyektlərinə mümkün hava zərbələri endirməyi daha sıx dairədə, etibar etdiyi müşavirləri ilə müzakirə edir.
AZƏRTAC ABŞ mediasına istinadla xəbər verir ki, Donald Tramp İranda hərbi əməliyyatlara razılıq verməsi ilə bağlı qəti qərara gəlmək üçün həm administrasiya daxilində, həm də onun xaricində daha geniş müttəfiqlər qrupundan məlumat almağa çalışır.
Tramp, həmçinin öz səlahiyyətləri daxilində qərarlar qəbul etmək üçün Yaxın Şərq məsələləri üzrə nümayəndəsi Stiv Uitkoffla məsləhətləşir. Eyni zamanda, hərbi əməliyyatlara qarşı olduğu bilinən milli kəşfiyyat rəhbəri Tulsi Qabbardın əsas müzakirələrdən kənarlaşdırıldığı və müdafiə naziri Pit Heqsetin də Trampın müntəzəm qərar qəbul etmə dairəsindən kənarda qaldığı bildirilir.
Bunu təkzib edən Pentaqon sözçüsü deyib: “Bu iddia tamamilə yalandır. Heqset Prezidentlə tez-tez danışır və bu həftə Situasiya otağındakı müşavirədə olub. O, Prezidentin “güc vasitəsilə sülh” yanaşmasını dəstəkləməyə davam edir”.
Müdafiə mənbələri və keçmiş administrasiya rəsmisi İran məsələsində Trampın yaxın dairəsində Birləşmiş Qərargah Rəisləri Komitəsinin sədri general Den Keyni, ABŞ Mərkəzi Komandanlığının rəhbəri general Erik Kurilla və Mərkəzi Kəşfiyyat İdarəsinin direktoru Con Ratkliffin olduğunu bildiriblər.
Proseslə tanış olan iki mənbə bildirib ki, İkinci Dünya müharibəsindən sonrakı sələflərindən fərqli olaraq, Tramp xarici və hərbi məsələlərdə yüksəkvəzifəli məmurların strukturlaşdırılmış siyasət brifinqlərinə etibar etmir. Belə ki, onun qərar vermə tərzi daha qeyri-rəsmidir, söhbətlər tez-tez administrasiya üzvlərinin, xarici liderlərin iştirakı ilə aparılır. Mənbələr əlavə edib ki, bu cür daha az rəsmi üslub başqalarının onun fərziyyələrinə etiraz etmək və ya narahatlıqlarını bildirmək imkanlarını məhdudlaşdıra bilər.
“NBC News” əlavə edib ki, Ağ evin mətbuat katibi Kerolayn Levittin İranla bağlı qərarın iki həftə müddətinə veriləcəyi ilə bağlı bəyanatı Donald Trampın İran-İsrail münaqişəsinin danışıqlar masası arxasında həll oluna biləcəyi variantını da istisna etmədiyini göstərir.
Bölmənin digər xəbərləri
