“Neftçi” klubunun məşqçi-metodistinin oyunların idman nəticəsinin manipulyasiyasında iştirakı müəyyən olunub
Bakı, 6 dekabr, AZƏRTAC
Son günlər futbol üzrə Azərbaycan Premyer Liqasının bəzi oyunlarının nəticələrinin manipulyasiya edilməsi ilə bağlı haqlı olaraq böyük narazılıqla qarşılanan hadisələrdə “Neftçi” komandasının da adı hallandırıldığından klub rəhbərliyi tərəfindən daxili araşdırma aparılıb. Xüsusən, AFFA-nın İntizam Komitəsinin dekabrın 1-də keçirilən iclasında qəbul edilən qərardan sonra buna ciddi zərurət yaranıb.
AZƏRTAC klubun saytına istinadla xəbər verir ki, araşdırma nəticəsində “Neftçi”nin məşqçi-metodisti Ağakişi Mehdizadənin oyunların idman nəticəsinin manipulyasiyasında iştirakı müəyyən olunub. O, yazılı izahatında özünü təqsirli bilərək prosesdə fərdi xarakterli iştirakını etiraf edib. Bu səbəbdən məşqçi-metodist Ağakişi Mehdizadə dərhal tutduğu vəzifədən azad olunub.
Araşdırma zamanı toplanan materiallar aidiyyəti üzrə AFFA-ya göndərilib.
“Neftçi” klubu bəyan edir ki, idman oyunlarının nəticələrini manipulyasiya edənləri şiddətlə qınayır və bu cür qanunazidd halların qarşısının alınması üçün mübarizə aparan bütün qurumlara dəstək verməyə hazırdır.
Qeyd edək ki, Ağakişi Mehdizadə daha əvvəl “İnter” peşəkar idman klubunda (hazırkı “Keşlə”) məşqçi-metodist vəzifəsində çalışıb.
Bölmənin digər xəbərləri
